Sorkar laipui chuan tun laia hmeichhiaten vantlang inbiakpawhna (social media) kaltlanga mipat hmeichhiatna kawnga khawih an tawk tih an puanna, #metoo movement-a thu kal zelah hmeichhiate, an hnathawhna hmuna hetiang tawkte dan anga ngaihtuaha an himna tur ngaihtuahtu tur, Group of Ministers (GoM) a din.
Sorkar thuchhuah chuan GoM din thar hi Home Minister Amit Shah-a’n a ho dawn a. Road Transport & Highways Minister Nitin Gadkari, Finance Minister Nirmala Sitharaman leh Women & Child Development Minister Smriti Irani te an tel.
GoM hian khauh zawka hetiang thil thlenga hremna lek theih a nih dan tur te, hetiang kaihhnawih dan awmsate a taka hman a nih theih nan leh tihchak zawk a nih theih dan tur te an ngaihtuah dawn a ni.
Thla thum chhung daih turin he GoM hian hnathawhna hmuna hmeichhiate an him theihna tur an ngaihtuah dawn a, an him zawkna tur ruahmanna an siam dawn a ni.
Social media-a hmeichhiate inpuanna, #metoo movement an tih hi India-ah a lar chak hle a, Union Minister MJ Akbar pawhin a nihna atangin a chawlh phah tawh a ni.