H.Thanzauva Memorial Mamit District Inter Village Football Tournament chu Zirtawpni zan khan Chhimveng YMA Hall, Mamit-ah Er. H. Lalzirliana, Mamit Bialtu MLA leh Vice Chairman, Roads & Infrustructure Development Board chuan a pet hawng.
Er. H. Lalzirliana chuan Mamit district chhunga infiam mite hmakhua ngaih avanga football tournament buatsaih a nih thu a sawi a, he tournament hlawhtlin theih nana tha thawhtu/tanpuina/sponsorship petute zawng zawng chungah lawmthu a sawi.
“Mamit district chu infiamna, zirna leh infrustructure-ah hriat kan la hlawh tawk lo hle a, hmasawnna tur tam tak kan la nei a ni,” a ti. “Kan sorkarin thalai infiam mite hmakhua ngaiin a vei hle a, district chhungah infiamna lama hma kan sawn theihna turin hma nasa takin a la mup mup a, sports minister pawh a phur hle,” a ti a. District chhunga hma a laknate a tar lang, sport infrustructure nei tha ber district an la nih thuai a beisei thu a sawi.
Bialtu MLA chuan, “Mizo thalaite hian tih tak zetna kan mamawh hle a, chumi tel lo chuan hlawhtlinna a awm thei lo,” a ti. Ram tana hna a thawhna kawngah tih tak zeta a beihna chu malsawmna a dawnna a nih thu sawiin, Mamit Bial mipui tan theihtawpchhuah chu a tum leh intiamna a nih angin tan a lak zel dawn thu a sawi a, thalaite chu thluak hman hun leh thinlung hman hun hria-a ngaihtuahna puitling tak nei tura chahin, Inter Village Football Tournament chu hlawhtling taka buatsaih a nih theihna tura theihtawp chhuah turin thalai infiammi kalkhawmte chu a chah.
H.Thanzauva Memorial Mamit District Inter Village Football Tournament 2023 Kick off hi Lairokhuma, President MDFA & Chairman Organising Committee chuan a kaihruai a, H.Lalchhandama, Treasurer MDFA, H. Lalthlengliana, Treasurer, All Mizoram VC Association ten tournament buatsaih a nih theih nana Bialtu MLA Er. H.Lalzirliana hmalaknaah lawmthu an sawi bawk.
Mamit District Inter Village Football Tournament-ah hian VC team 24 tel tur inziak lutin, September 25-ah tan a ni dawn a. October 6, 2023-ah final khelh tum a ni a. Champion team hian Rs 1,10,000 an dawng ang a, 2nd Runner Up hian Rs. 55,000 an dawng ang.