- Lallunghnema, Charity Lodge
Consumer Protection Act hian a huam zau khawp mai a.Mitin tana Dan pek tih a ni a.India ram ropui tak President chuan December ni sawm hnih pali, kum sangkhat zakua sawm riat paruk khan a hming a lo ziah hnan ta a ni a . Dan rangkachak keini chuan kan ti nghe nghe a ni.
He December ni 24 hi National Consumer Day-a puan a ni ta nghe nghe a.Tichuan, he ni hi Consumerte tan Ni pawimawh tak a ni chho mek ta zel a ni He Danin a tiam leh pek ang ngeiin sum seng a thil leitu leh tha(force&service) hmangtu zawng zawngte chu dikna leh chanvo pek vek kan ni a, Consumer kan ni vek tihna a ni h chu! He Dan hian mi lian leh mi tê a huam vek a ni. Chief Minister leh Governor-te a huam a, Sakhaw hruaitu Puithiam te pawh a huam vek bawk. An za vaiin Consumer an ni. Tumahin,” Consumer ka ni lo,” an ti ngawt thei lo. Danin dikna min pe vek a ni.
Consumer Protection Act 1986 chu kum 33 chuang teh meuh hman a nih hnuin huam zau zawk leh tangkai zawka hman a nih theih nan he Act hi tih tawp a niin Consumer Protection Act 2019 chu siam a lo a ni ta a.He Act hi mipuiin kan tangkaipui chho mek zel a ni.
Kan sawi tawh angin tun thlengin Mizote hian Dan hi kan hriat loh avangin kan tuar nasa hle a. Consumer Protection Act kan hriat loh avangin nitin kan tuar thin a ni. Tuarna leh harsatna pumpelhna tha ber chu Consumer Protection Act 2019 hriat hi a ni.
Kan au chhuahpui fo tawh angin Gas Consumer-te hi dikna leh chanvo nei kan ni a. Gas Consumer – te hi Gas Distributor te tan an pawimawh em em a ni. Consumer tha an neih chuan an lawm a, an hlawhtling a ni.Consumer-te laka that chhuah chu an bat a ni.Mipui rawngbawl saktu an nih hi an theih nghilh thiang lova,an hre reng tur a ni zawk e.
Hetiang hian ka’n âng leh hlak teh ang. Mizoramah hian Gas Consumer-te kan inthlahdah lutuk leh ngaihsam em avangin gas home delivery hi tun thlengin hmun tam zawk fêah tih a la ni lova. Hetih lai vekin Consumer tam tak chuan zep nei miah lovin han sawi ta ila,home delivery hi tul pawh an ti lo a ni. Hah thlak tak a ni! Khawtlang hruaitu tam zawk fê lahin an ngai pawimawh hek lo. Mahse,kan duh emaw duh lo emaw lam ni lovin Gas home delivery hi tih tur ‘(compolsory) a ni bur a. Lo hnial chi rual a ni love. Chutah,Gas Distributor-ho lah chuan home delivery tih an lo hreh tum hrang bawk si a.A ropui lo khawp mai.
Chuvangin home delivery hi lo welcome hle tur a ni ringawt.Mahse,chu chu kan thei mawlh si lo . Consumer tam zawk chuan a rim a ra pawh kan la hre pha ta meuh rih lo a nih hi! .Kan hetih mek lai hian Gas Distributor-te chuan Digital Booking an kalpui a.An Booking kalpui dan lah hi sawi fiahna hran a awm loh avangin mi tam takin an buai phah a.Gas lak dawn hnaih hun chep takah mobile phone hmangin online booking tihtir an ni a.He thu ziaktu ngei pawh hian a takin ka tawng ta mek a ni.
Hetiang hian ka Contact Mobile phone-ah message ka dawng a.
“No CX14491868 is registered with reference No 2-00317374906 Refil expected delivery: 1 days Pay by Https//payitcc/13378 134495- 11/9/2023”.
He message in a sawi nia lang chu ‘Gas refill i book kha dawn a ni a. Ni I hnuah Gas hi i hmuh beisei a ni.’ tiin. Gas hi home delivery tih anga kalpui a ni em?tih chu zawhna lian tak a ni nghal.Consumer eng emaw zatin hemi chungchang hi min zawt reng a. Chuvangin September ni 22 zing karah khan Gas Distributor pakhat Manager chu ka va bia a.
He Digital Booking avang hian mi tam tak an buai phah a ni. He thil ,’serious,’ tak hi zawttu ka ngah thu Manager hi ka va hrilh a. Media kal tlanga thil awmzia leh nihphung sawi fiah turin thurawn ka va pe nghal ta nghe nghe a ni. Manager pawh chuan, “Nia, hei hi Company thupek a ni a, home delivery tih nan a ni lova, home delivery charge lak a ni lo bawk a, sawifiah a tha khawp mai,” min lo tih pui bawk a. Kei chuan,”Keini mipui lam chuan home delivery charge la a, home delivery ti chuang si lo hian kan ngai thin deuh che a ni” ka ti bawrh bawrh nghe nghe a ni. Hei hi mipui zawhna a ni, an ngaih pawh a tha lo hle, ka ti leh ta zel a. Hei hi exploitation a ni thei em? tih hi zawhna lian tak a ni reng bawk a..Indian Oil Company hnenah complaint theh luh a la ni ang chu.
Thla hnih khat kal taah khan Electric current kal chak thut avangin veng pakhata chhungkaw engemaw zat thil a chhia a. Television-te, Computer-te, Washing Machine-te leh Fridge-te a chhia a ni âwm e. Anmahni duhsaktuten min lo hrilh a, Ka um zui hreh loh chi a ni bawk a. Hma ka han lakpui dawn a. An tlan chhe ti tih ta ringawt mai a. An mahni puih tum zawk khan ka nawr ta chiam a nih chu! Thil buaipui tur khawpin an huaisen tawk lova, an changkang tawk lo tihna a ni. Consumer Forum a Member ka nih lai khan hetiang Complaint hi ka dawngin kan buaipui ngial tawh a. Power kal sual avanga vanduaina tawkte hi thiam chantir an ni a. Power Dept.chu hrem. turin rel a ni hial ni tain ka hria. Eng pawh ni se, Mizote hi politics chhia leh puar pawleng mai maiah hian i tui lutuk tawh lo teh ang u. Politics dik zawk consumer politics I khel ang u, tiin kan insâwm a ni.
Shopping Mall-ah te chuan sumdawng hovin dawr lian pui pui an nei a. An thil zawrhte chu a lian emaw a te emaw customerten an thil lei an khaina tur carry bag an ngaihtuahsak thin tur a ni. Mahse hmun thenkhatah chuan an lo duhâm hle thin a. An Customer-te chu bag man an lo ‘charge’ thin a ni àwm e. Hei hi Consumer Protection Act bawh chhiatna a ni a, Unfair Trade Practice a ni. Reliance Dawr chuan an customer pakhat hnenah Paper bag man Rs 7/- an lo dil avangin ConsumerCommission chuan Rs 3000/- a chawitir a ni.Saptawngin ti hian tarlan a ni.
“Charging Rs 7/- for carry bag by Reliance hands: Against interests of the Customers. Consumer Commission directs to pay Rs 3000/- for harassment.”
Cold Drinks Sprite burah tho thi(deadly fly) a lo awm avangin Assam State Consumer Commission chuan Coca Cola Company India chu hremin Complaint hnenah Rs 5000/- Compensation pe turin thuthlukna a siam bawk. Sap tawngin hetiang hian tarlan a ni, “ Deadly fly in the bottle of Sprite, Assam State Consumer Commission directs Coca Cola India to pay Compensation of Rs 5000/- to the Complaint,” tiin.
He thu atanga kan zir tur chu thingpui dawr,restaurant,hotel,motel-ahte hian ei-in fimkhur hle tur a ni.Thil ei-in a thianghlim loh chuan taksa tan a pawi a,hriselnain a tuar thin.. Tun tum atan chuan kan duh tawk rih ang.
Consumer right hriatna kawnga puihngai chuan hetiang hiang ziakin emaw, WhatsApp in emaw,phone-in emaw,dawr theih kan ni e.
- Centre for Consumer Education
Charity Lodge, H/34
Republic, Mual Vengchung.
Aizawl-796001, Mizoram.