Gauhati High Court Judge Justice Nelson Sailo-in Inrinni khan Siaha District Court building sak mek Siahatla ami chu a tlawh a. District Court building hmunhma leh a panna kawng zauh leh siamthat dan tur bakah court building-in a mamawh thil dang te a enfiah.
Justice Nelson Sailo ho hian a kaihhnawih mipawimawh ten Siaha District Court leh building in amamawh hrang hrangte leh hmalakna tur la awm ang ang te an sawiho nghal a. Justice Nelson Sailo hi Registrar Gauhati High Court Aizawl Bench Joel Joseph Denga, District & Sessions Judge, Lunglei Judicial District T.L Guite bakah Deputy Secretary, Law & Judicial Thomas Lalrammawia ten an tawiawm a ni.
Hemi ni vek hian Justice Nelson Sailo chuan Lawngtlaia Judicial Quarters sak mek, Type I & II Rs 119,90,755 senna tura ruahman leh Judicial Quarters Grade II Rs 95,19,999 senna tura ruahman sak mek pawh tlawhin a enfiah a. Heng Quarters sak mek te hi a zawh hun tura ruahman chu pel tawh mahse, a rang lama hna zo turin Contractor-te a hrilh a. Lawngtlai district Court-a thawktute chenna tur Quarters indaihlohna chu a rang lama phuhruk a nih theih nan hnathawktute chu an hna thawk zo thuai turin a hrilh a ni.
Justise Nelson Sailo chuan Chief Judicial Magistrate Office pawh tlawhin, Lawngtlai district-a thuneitu Deputy Commissioner, Superintendent of Police leh Project Director, District Rural Development Office leh Official thenkhatte nen an inkawm a. Sorkar inrelbawlnaa thil pawimawh hrang hrangte a sawipui.