India rama luipui chunga kal ropeway sei ber tur chu nimin khan Guwhati, Assam-ah hawn a ni ta.
He ropeway hi Guwahati leh North Guwahati inkara kal tur niin Assam Chief Minister Himanta Biswa Sarma leh Guwahati Development Department Minister Siddhartha Bhattacharya chuan an hawng dun.
Ropeway hawn tak hi km 1.8-a thui niin vawi khat kal nan minute 8-9 hun a hmang dawn a. A chuan man hi mi pakhat tan lehlam atanga kalin Rs. 60 a ni ang a, haw lam nen chuan Rs. 100 a ni ang.
Ropeway hi Kachari Ghat, Panbazar atanga thunun tanin heta tanga chhuakin Dol Govinda temple, North Guwahati thleng a kal dawn a ni.
Brahmaputra luipui chungah lakin a hmangtute chuan khawthlir pahin lirtheia kal aia zinkawng hun rei lo zawk hun an hmang dawn a ni.
Assam chuan he ropeway hmang hian khualzin pawh a hip luh theih an inbeisei a. Kawng (hrui) pahnih hmang niin bi-cable double reversible jig back system a hmang.
A chuannaah hian cabin pahnih awmin mi passenger 32 zel vawi khatah an chuang thei dawn a. A siam nan hian Rs Nuai 5,608.20 lai sen a ni a, nikum khan peih a lo ni tawh.
Ropeway hi sorkar laipiin technology hman tur a duan leh khawvel huap pawha hman tlak an tih anga ruahman a ni.
Boruaka hrui hmanga zinna hi a sum sen a tlem bakah lirtheia veivah aiin boruak tichhetu a nei tlem a, khuarel tana thil tha a nih bakah khualzin hiptu tha tak a ni.
Electric power hmang a nih avangin a bula khuarel thil awmte tichhiaa kawng sial a ngaio lo va. Boruaka kal daih a nih avangin leia kal aiin a rang zawk bawk a ni.