Sorkar laipuiin Manipur mim an sahimna zawnga Mizorama lutte chhawmdawlna tur a pe hnai nia hriat a ni a, hemi chungchang hi Mizoram sorkar chuan official-in a la dawng lo thung.
Mizoram sorkar chuan May thla khan Manipur raltlante tanpuina tur sum chu sorkar laipuiah a dil a, hun rei tak chhung chhanna a awm loh hnuah tun hnai khan sorkar laipui hotuten Mizoram sorkara home department hotute telephone hmanga be pawpin, raltlante puihna tur an pek hnaih thu hi an hrilh a, ziak erawh chuan thu chiang an la dawng lo thung.
Zawhna chhangin Home Commissioner H Lalengmawia chuan sorkar laipui hotuten tawngkaa an rawn biaknaah chuan tanpuina chu suma pe loin, an mamawh tur bungrua anga pek an tum nia an sawi thu a sawi a, district hrang hrang bawrhsapte nen ei leh in bakah an mamawh dang hrang hrang thla ruk daih tur chu a theih anga chhut khawmin sorkar laipui hotute hnenah an thehlut tawh tih a sawi.
Hetihlai hian chhawmdawlna an rawn pek dan tur chungchang hi mumal taka ziaka an la dawn loh avangin eng hunah nge Mizoramin a dawn ang tih pawh an la sawi theih loh thu H Lalengmawia chuan a sawi bawk.
Tar lan tawh thin angin Mizoramin Manipur raltlan a mikhual tan tirh, May 23 khan Chief Minister Zoramthanga’n raltlante chhawmdawlna tur sum Rs vaibelchhe 10 dilna chu sorkar laipuiah a thehlut a, hemi chungchang bawhzuia sorkar laipui dawrin Mizoram minister-te pawh Delhi-ah tirh ni mah se thawm an la nei lo chhunzawm zel a, tun hnai khan tawngkain chhawmdawlna an pek hnaih tur thu hi sorkar hotute an rawn hriattir ta a ni.
Home department hotuten an sawi danin tun dinhmunah Manipur mi, Mizorama an sahimna zawnga lut, district hrang hranga awm hi an vaiin mi 12,000 vel an ni.