Israel sorkar hnuaia ralthuam siam chhuaktu, Israel Aerospace Industries (IAI) chuan $ mtd 777 hu zet, Indian Navy-ten an lawng pasariha an hman tur, LRSAM air & missile defence systems siamna turin contract an ziak fel leh ta tih nimin khan an puang.
Thawkhova ralthuam insiamsakna tur contract hi India-a sorkar enkawl, Bharat Electronics Ltd (BEL) nen siamin anni hi he ralthuam contractor hi an ni sa a ni.
Long Range Surface-to-Air Missile (LRSAM) siam tur hi Barak 8 an tih chhungkuaa mi a ni a. Barak 8 chhungkuaa ralthuam dangte pawh hi Israel tuipui sipaite pawhin air leh missile defence system-a an hman lai a ni a. India ramah hian tuipui sipaite bakah air leh khawmual sipaite pawhin an hman a ni.
He inremna neih thar tak nen hian Barak 8 huanga indawr tawnna hi $ tld 6 chuang a tling dawn ta a ni.
Israel leh India ram hruaitute hian kawng hrang hrangin thawhhona an nei a, lo neih leh technology changkang zawk lam thlengin inremna an siam a. Hemi piah lamah hian United States leh hun rei tak a lo kawmngeih tawh, Russia tih lovah India-in ralthuam tha a chawk luh tamna ram a ni bawk.
Nikum khan IAI hian $ tld 2 man hu dawn India sipai leh navy-te hman tur missile defence system leitirna tur inremna an lo siam tawh a. A hnu lawkah $ mtd 630 man zet, Indian navy lawng 4-a Barak 8 surface-to-air missile systems vuahna turin BEL nen inremna an siam leh bawk.
Barak 8 hi IAI hian Israeli defence ministry leh India-a DRDO puihna nena an duan a ni a, ram hnih hian an tuipui sipaite an hmantir tawh a ni.