Mizoram infiamna huangchhunga inelna hautak zinga mi, kawngthui zawh a thirsakawr intlansiak Tour de Hmuifang vawi 3-na Inrinni khan Tourism Minister Robert Romawia Royte chuan Vanapa Hall kawt atanga vailiamin an nei.
Aizawl atanga Hmuifangtlang thleng tlan a ni a, hming pe 64 zingah mipa 57 leh hmeichhia 5 an tel a, state pawn atangin mi 2 an tel. Category tinah champion hmelthar an awm.
Tourism Department leh Mizoram Cycling Association (MiCA) tangkawpin an buatsaih Tour de Hmuifang hi World Tourism Day 2023 ni 27 September a hman tur denchhen a huaihawt niin he inelna ah hian categoty chi hrang panga a awm a – Junior, Elite, Master leh Road (Open) category bakah a vawikhatnan Hmeichhe category (exhibition) hran buatsaih a ni.
Junior leh Masters category te hi Maubuang khawchhungah lutin, Thiak khawchhungah lut lehin Hmuifangah an thleng a. Open (Road) hi Hmuifang kawngdung pangngaiah an tlan a, Elite hi Maubuang Damdiai atangin Changte-ah an chhuk a, Samlukhaiah lawnin Chamring lam atangin Hmuifang an lut thung.
Junior (kum 18 hnuai lam)-ah Vanlalruata, Tuirial pakhatna a ni a. Masters (kum 35 chin chunglam) -ah Peter Zohmingliana, Bungkawn chu pakhatna a ni thung.
Open (Road Category)-ah Dr. Lalrinmawia, Hunthar pakhatna a ni a, inelna hautak ber Elite category-ah Richard Zorinsanga, Thenzawl Field veng pakhatna a ni bawk.
Kharna leh lawmman semna hun hi Hmuifang Tourist Resort-ah hman a ni a, Dr. Lalrozama, IAS Secretary, Tourism Dept. chu khuallian a ni.
Mizo thirsakawr khalh mite hian India Hmarchhak huap inelnaah lawmman an lo dawng fo tawh a, India ram hmundanga intlansiak rothap, hnamdang ramdang mite nena inelna, Himalaya tlang pang per awih bakbahai leh khawkrawk tak taka intlansiaknaah te pawh an lo tel tawh a, tunah hian Mizoram aiawha zinchhuak mêk pahnih an awm bawk.
- Category hrang hrang result:
Elite
Pakhatna : Richard Zorinsanga, Thenzawl
Pahnihna : Mohnendra Jaiswal, Uttarakhan
Pathumna : Malsawmchhuanga Sailo, Electric Veng
Junior
Pakhatna : Vanlalruata, Tuirial
Pahnihna : Vanlalngaihawma, Vaivakawn
Pathumna : Hmingsangbera, Zemabawk North
Masters
Pakhatna : Peter Zohmingliana, Bungkawn
Pahnihna : C. Lalnunmawia, Tuikhuahtlang
Pathumna : David Rualzakhuma, Saron Veng
Open Road
Pakhatna : Dr Lalrinmawia, Hunthar
Pahnihna : Dr Dennis Malsawmtluanga, Hunthar
Pathumna : L. Langousiam Ngaihte, Lamka, Manipur