Aizawl: Mizoram infiamna huang chhunga inelna hautak berte zinga mi, kawngthui zawha thirsakawr intlansiak, Tour de Hmuifang vawi 3-na kharna leh lawmman semna hun Inrinni chawhnu khan Hmuifang Tourist Resort-ah hman a ni a, Dr. Lalrozama, IAS Secretary, Tourism Dept. chu khuallian niin, he hun hi V Lalengmawia, Jt. Secretary, Tourism Department-in a kaihruai a ni.
Category hrang hranga lawmman dawngtute chu hengte hi an ni: Junior (kum 18 hnuai lam)-ah Vanlalruata, Tuirial pakhatna a ni a, Masters (kum 35 chin chunglam)-ah Peter Zohmingliana, Bungkawn chu pakhatna a ni thung. Open (Road Category)-ah Dr. Lalrinawma, Hunthar pakhatna a ni a, inelna hautak ber Elite category-ah Richard Zorinsanga, Thenzawl Field veng pakhatna a ni bawk.
He intlansiaknaah hian hming pe 64 zingah tlan zat mipa 54 leh hmeichhia panga an tel a, state pawn atangin mi pahnih an tel a, Tourism Minister Robert Romawia Royte chuan a vailiam.
Tourism Department leh Mizoram Cycling Association (MiCA) tangkawpin an buatsaih hi World Tourism Day 2023, September 27-a hman tur denchhen a huaihawt niin he inelnaah hian category chi hrang panga a awm a – Junior, Elite, Master leh Road (Open) category bakah a vawikhatnan hmeichhe category (exhibition) hran buatsaih a ni bawk.
Junior leh Masters category te hi Maubuang khaw chhungah lutin, Thiak khaw chhungah lut lehin Hmuifangah an thleng a. Open (Road) hi Hmuifang kawngdung pangngaiah an tlan a, Elite hi Maubuang Damdiai atangin Changte-ah an chhuk a, Samlukhaiah lawnin Chamring lam atangin Hmuifang an lut thung.
Mizo thirsakawr khalh mite hian India hmarchhak huap inelnaah lawmman an lo dawng fo tawh a. India ram hmundanga intlansiak rothap, hnamdang ram dang mite nena inelna, Himalaya tlang pangper awih bakbahai leh khawkrawk tak taka intlansiaknaah te pawh lo tel tawhin, tunah hian Mizoram aiawha zin chhuak mêk pahnih an awm bawk.