AIZAWL: YMA inkhawmpui lian kumin October 24-26 chhunga Biate khuaa neih tur inbuatsaihna kal mekah pandal leh a chheh vel hnathawh tur zaa 95 vel thawh zawh a ni tawh.
YMA Inkhawmpui Lian, Zialung Rûn, Biate khuaa neih turah hian inbuatsaihna ngawrh taka kalpui a ni a, tunah hian pandal leh a chhehvela office hrang hrang leh dawr tur pawh sak zawh a ni tawh a, pandal bikah hian thutna tur thutthleng rem tih loh chu zawh fel thawkhat a ni tawh bawk.
Pandal hi a dung feet 150 avang feet 120 a sak a ni a. Biate khaw mipuite chuan pandal chu karleh chhung khian engkim peih fel hman vek an tum a ni.
Zirtawpni khan CYMA atangin programme committee-te Biate-ah kalin inkhawmpui inbuatsaihnate enpuiin organising committee nen inkawmhona an nei a, CYMA Treasurer Fabian Lalfakawma, Programme Committee Chairman chuan YMA Inkhawmpui Lian thleng tura Biate khawtlang inbuatsaihna leh tanrualna a that thu leh ropui a tih thu a sawi.
Inrinni khan E. Lungdar Joint YMA chuan inkhawmpui lian neihna hmun tur pandal-ah an hnatlang a, member 40 zet an thawk a, tul leh pawimawhte an thawk a, organising committee an lawm hle.