Aizawl FC in round hmasa lama an tlawmna nawtrehin hnehna an chang a, Project Veng FC lakah 6-0 in an chak.
Thawhtanni a Zote Toyota Mizoram Premier League 10 round sarihna inkhelah hian Aizawl FC tan forward rinrawl Lalrinzuala chuan hattrick a siam a. Halftime hma leh hnuah R. Ramdinthara chuan goal khung bawkin Lalramsanga’n goal khat a khung bawk.
Aizawl FC hi tun season MPL-ah vawi thum an chakna chauh a ni a, point hloh nei leh thin mahse season chawhnu lamah chetthat tluan theih an inbeisei tawh ang. Hetihlai hian thla tharah I-League season tan a ni dawn a, an fixture a tawt zual ang.
Inkhel hmasa zawkah Chanmari FC in an chetthat chhunzawmin 3-1 in Electric Veng FC an hneh a. Tlawm la nei lovin hma an hruai.
Chanmari tan hian Laldanmawia Ralte, Lalkhawpuimawia leh Lalnuntluanga ten goal an khung a. Electric Veng tan H. Zawnhmingthanga’n penalty a khung ve bawk.