Aizawl: Aizawl District Court-a Special Judge (Prevention of Corruption Act) chuan Chakma Autonomous District Council chief executive member lo ni tawh leh tun sorkar kal meka CADC chairman ni lai, Kali Kumar Tongchangya chu eiruk thu buaiah thiam loh a chantir.
Special Judge (PC Act) Dr HTC Lalrinchhana chuan nimin khan thuremna hi a puang a, heta a tar lan dan chuan District Council & Minority Affairs Department-a Under Secretary ni thin, Zohmingthanga chuan July 26, 2018 khan Chakma Autonomous District Council (CADC) chhunga hmasawnna tur sumpai tihchingpen chungchangah Anti-Corruption Bureau (ACB)-ah thubuai a theh lut.
CADC Chief Executive Member KK Tongchangya chu CADC executive secretary cum DDO hnen atanga kawng siamna tur, NLCPR fund Rs. 17,903,773 chu an party campaign fund leh an party senso a tana laah puh a ni a, ACB-in thubuai an chhui zuinaah KK Tongchangya-a thu pek angin sum tam tham tak chu dikhlel takin pek chhuah a ni tih hmuh chhuah a ni a, court-in thuhretu hrang hrang thusawi leh ACB-te thil man hrang hrangte a buk hnu KK Tongchangya, Lawngtlai district chu thiam loh a chantir (convict) ta a ni.
Court thuremnaa tar lan a nih danin ACB-in KK Tongchangya-a’n sum a tichingpen nia an chhui chhuah chu Rs. 9,00,03,773 a ni a, pawisa tihchingpen Rs. nuai 126 chu hmuh let a ni thung a, court hian hlemhletna pawisa man chhuah Rs. nuai 126 zet chu sorkar sumbawm a dah nghal turin thupek a siam bawk.
Special judge-in eiruk thubuaia thiam loh a chantir tak, KK Tongchangya hi jail-a dahluh nghal tur a ni a, vawiinah hrem a nih dan tur puan a ni ang.