Intelligence agency-te chuan Delhi, Mumbai leh Goa-a police-te chu inralring turin an hriattir a. Tun hnaia New Zealand-a Muslim biak in beih a nih phuba lak tumin Islamic State leh al-Qaida firfiak pawlin chet an tum niin an hria.
New Zealand-a mosque pahnih beih a nih avang khan Muslim firfiak pawl hian Jewish hmunah te chet an tum niin an hria a, ni li vel liam ta atang khan ngun takin an lo thlithlai tawh.
Hnu chhui mite hian firfiakte hian lirthei emaw, chem emaw pawh an hmang thei ve ve tih an sawi a. Agency-te hian Mumbai-a Israeli Embassy, Consulate General te bakah synagogue leh Chabad house hrang hrangte vil uluk lehzual turin an ti.
Muslim firfiakten India-a chet an tum tih hi Nilaini kal ta khan a vawi khat nan hriat a ni a. IS hian an cell-te biain Christchurch, New Zealand-a mosque beihnaa Islam 50 zet thah an ni chu phuba lak an tum tih hriat a ni.
Agency-te chuan, “A hrang hrang atanga thu kan dawnah, IS thupuangtu, Abu Hassan al-Muhajir-an aw a thun online group thenkhata vawrh darhah, mosque beihna phuba la tura fuihna a awm a. He audio-ah hian inbe thawm pawh a awm a, hei hi an pawlte an be thawm nia hriat a ni,” an ti.
Delhi Police chuan hmun thianghlimte uluk zawkin an veng tih an sawi a, “Kan vil reng,” tiin officer pakhat chuan a sawi.
A vawi hnih nan Inrinni khan al-Qaida cell-in Jewish chenna leh synagogue vel beih an tum tih hriat theihna, inbiakna pakhat hriat leh a ni a. Hmanrua atan chem, car leh truck an sawi rik pawh a awm a, Goa-a hmun thenkhat pawh an sawi ri bawk.