Japan International Cooperation Agency (JICA) sum Rs. vaibelchhe 700 senga Cancer Hospital, Mizoram State Super Specialty Cancer & Research Centre sak tanna tur lungphum chu nimin khan Chief Minister Zoramthanga’n a phum.
Hemi puala inkhawm neihah Zorama chuan Mizoramah cancer vanga boral an tam thu te, cancer-in ram mipui a tihbuainate chu research centre hian nasa takin a tanpui thei dawn tih sawiin, cancer hospital dinna tura puitu Japan sorkar leh JICA chungah lawmthu a sawi.
Chief minister chuan Mizoramah cancer vei an tam chhan chu mi thiamten an sawi angin zuk leh hmuam tih nasat lutuk vang nia a lan thu sawiin, hei vang hian mipuiten nunphung hrisel leh thianghlimna lam an uar deuh deuh a tul tih te, cancer enkawlna tha leh changtlung tak awm mah mah se a pawimawh zawk chu cancer hospital-a luh ngai lo tura inbuatsaih a nih thu a sawi.
JICA India Office-a Senior Representative Hajime Taniguchi pawhin thu sawiin, India leh Japan sorkarte thawhhona kawngah India hmarchhaka hriselna lam tihhmasawn chu a peng pawimawh a nih angin Mizoram sorkar nena inbiak hnuah he ruahmanna hi JICA chuan a pawm ta tih a sawi a, Mizoramin state dangte entawn tlaka hmalak a tum dante a hriatpui thu leh chhuanawm a tih thu a sawi.
Inkhawma an tar lan danin Zemabawka cancer dam lo enkawlna, Super Specialty Cancer & Research Centre din tur hian February 23, 2023 khan India sorkar leh Japan sorkarin loan puk tur inremna an ziak a, hospital-ah hian khum 200 awm tura ruahman a ni a, cancer natna enkawlna khawl tha ber bera thuam a nih dawn bakah research centre a nih angin thawktute pawh khawvel huapa rintlak (world class) ni tura beisei a ni dawn a ni.
Medical safety lam pawh changkang taka kalpui tur a ni ang a. A project pum pui man hi Rs. vaibelchhe 700 a ni a, za zela sawmhnih, Rs. vaibelchhe 160 chu Mizoram sorkar tum tur a ni a, hna hi kum 2028 kumtawp lama thawh zawh hman beisei a ni.
Lungphum inkhawm kaihruaitu, health department-a Principal Secretary Esther Lal Ruatkimi chuan cancer hospital dinna tura an bultan dan tlangpui tar langin, kum 2017-a hma an lak tan thu leh loan pukna tura inremna chu 2023 February-ah ziah theih a nih tak thu a sawi a ni.