Kerala chu NITI Aayog-in Healthy States Ranking a siamah a kum zawnin a chung ber dinhmun an hauh ta a. Bihar leh Uttar Pradesh chu state che chhe ber an ni thung.
‘Healthy States, Progressive India’ report thar hi nimin khan NITI Aayog Vice Chairman Dr. Rajiv Kumar chuan New Delhi-ah a tlangzarh a. Haryana, Jharkhand leh Assam te chu hriselna lam kawnga hmasawn nasa state pathum niin Chhatisgarh chu hmasawnna nei chhe ber a ni ve thung.
India rama state leh union territory-te hriselna lama an dinhmun tehna hi state leh UT-te hriselna lama hma an lak dan nghawng chhuah te, a kum hma lam chiah (2016-17)-a an dinhmun atanga (2017-18)-a hma an sawnna dante tar lanna a ni a. Hriselna lama thawhna, sorkar hmalakna leh hmalakna kalpui dan zawng zawng tihlanna a ni.
Ministry of Health & Family Welfare (MoHFW) leh technical lamah World Bank puihnain NITI Aayog hian report hi a buatsaih a ni.
Health Index hmasa a (2017 Health Index) kha February, 2018-ah tihchhuah a lo ni tawh a, kha kha state leh UT-te 2014-15 (base year) atanga 2015-16 chhunga hma an sawn dan tihlanna a ni.
Report hmasa zawkah khan Kerala, Punjab leh Tamil Nadu chu state lian zingah a che tha ber an ni a. Jharkhand, Jammu & Kashmir leh Uttar Pradesh chu a hma kuma tehna atanga hmasawn nasa state pathum an ni ve thung.
Jharkhand, Jammu & Kashmir leh Uttar Pradesh te hi teh tanna, base year atangin a kum dawt leha tehnaah Neonatal Mortality Rate (NMR), naupang kum 5 hnuai lam thi (under-five Mortality Rate (U5MR)), indanna pek that dan, damdawi in hna thawh that dan leh HIV kai mek (People Living with HIV (PLHIV))-ten Anti-Retroviral Therapy (ART) an lak that danah hma an sawn nasa hle a ni.
State tê an tih zingah Mizoram chu dinhmun tha ber niin Manipur-in an dawt a, Goa chu 3-na a ni bawk a. UT zingah Lakshadweep chu a che tha ber an nih bakah tehna hmasa leh tuna mi inkara che tha ber an ni bawk.
Report tlangzarhnaah hian NITI Aayog member Dr. V.K.Paul, NITI Aayog CEO Amitabh Kant, Union Health Secretary Preeti Sudan leh World Bank aiawh pawh an tel a ni.