Atletico Madrid in an hmelma Real Madrid chak tluanglai an tihtawpsak a, 3-1 in an hneh.
Estadio Metropolitano-ah Atletico tan Real Madrid striker hlui Alvaro Morata chuan goal hnih a khung a. Antoine Griezmann-a’n goal dang a khung.
Rojiblancos in minute 4-naah goal khung nghalin Samuel Lino ball cross hlauhawm chu Morata in a tauh lut a. Minute 18-naah Griezmann-a’n goal dang tauh lut ve lehin Atletico an chungnung.
Real Madrid in Toni Kroos goal mawi hmangin an chhanglet a, mahse halftime hma in Saul Niguez-a ball vawrh luh chu Morata bawkin an goal thumna ni turin a khung.
Hnehna an chan avangin Atletico hi panganaah an inhlangkai a. Hetihlai hian an inkhel hmasa panga a chak vek Real Madrid hi pathumnaah awmin Barcelona leh Girona hnauaiah an awm.
Atletico hian Pathianni zan inkhel hma hian La Liga bikah El Derbi Madrileño-ah match 14 atangin vawi khat chiah hnehna an chang a ni.
Inkhel dangah Real Sociedad in 4-3 in Getafe an hneh a. Takefusa Kubo hmanga hma an hruai nghal thuai hnuah Getafe in chhanglet mahse second half-ah Mikel Oyarzabal goal hnih leh Brais Mendez goal khung an chakpui.