Tottenham Hotspur in tum hnih si phur zawkah tang mahse an sut ve ve a, North London derby hmuhnawm takah an hmelma Arsenal nen 2-2 in an inhnehtawk.

Pathianni zana Emirates Stadium a inkhelah Arsenal in minute 26-naah goal an nei a. Spurs defender Cristian Romero chuan Bukayo Saka ball pet chu an lamah a dang lut palh.

Inkhel boruak a sang a, team pahnihte football khelh a huaisen a, chak tumin an khel ve ve bawk.

Arsenal manager Mikel Arteta chuan Aaron Ramsdale aia David Raya chunga rinna a nghah chuan rah tha a hring a. Brennan Johnson goal khung tur chu tum hnih a dansak.

Halftime dawnah erawh Spurs in goal an khung ta thova. Raya chuan Spurs in penalty area chhunga ball an pet luh chu a dang tha tawk lova, ball kal zel atang James Maddison-a’n Son Heung-min goal khung tur a siamsak.

Second half tan hnu lawkah Arsenal in hma an hruai leh a, Cristian Romero chuan handball atang penalty a chawi a. Video Assistant Referee thutlukna in sawizui a hlawh.

Penalty hi Saka chuan goal-ah chantirin Gunners an lawm. An lawmna erawh a rei lo. Halftime zawha dah luh Jorginho chuan ball hlohin Maddison bawkin Son-a goal khung tur a siamsak lehnghal a ni.

Arsenal in Declan Rice inhliam avanga lakchhuah ngai an tuar a. Tlarhmaah striker Gabriel Jesus-a’n 1-0 a hma an hruai laia an goal hnihna khung theihna remchang a neih a chhawr lo a pawi bawk.

Hetihlai hian manager Ange Postecoglou hnuaiah Spurs in hma an sawn tih chiang takin a lang. An football khelh a huaisen a, an hmuhnawm thin.

An tlarhnung la nghet lovin an beh zawk chang tam mahse an goal nawrlet a hlauhawm thin.

Arsenal manager Mikel Arteta chuan, “Point hnih kan hlohah kan inngai. Inkhel thununtu zawk kan ni a, kan chetthat zawk laiin kan chungnung hle. Goal kan khung hnuah erawh an rawn khung ve zel a ni.”

“Goal khung hi a awlsam lova, vawi hnih kan khung. Mahse ho tak taka goal kan chhuah ve avangin kan inelna angah hi chuan kan tuar thin dawn a ni.”a ti.

Tottenham manager Ange Postecoglou chuan, “Kan inkhel hrim hrimah kan theihna kan lantir kim viau in ka hria. Team tha an ni a, kan inven thiam pawh a ngai, chutihlai chuan huaisenna kan lantir tel a, kan goal nawr pawh a hlauhawm.” tiin a team a fak.

Inkhel dang

Liverpool in inelna hrang hrangah a zawnin vawi 18 tlawm nei lovin an kal mek a. West Ham United lakah Pathianni zanah an chak.

Anfield a inkhelah first half-ah Hammers kheltha mahse Liverpool in penalty an hmu a. Nayef Aguerd chuan Mohamed Salah ti tlu in Egyptian forward in goal a khung.

Halftime dawnah Jarrod Bowen chuan Hammers si phurh a sut a, second half-ah Liverpool tan Darwin Nunez leh Diogo Jota ten Liverpool tan goal an khung.

Stamford Bridge-ah Chelsea chetchhiat a la kal tluang a, Aston Villa in 1-0 in an hneh.

Blues defender Malo Gusto chu second half-ah hlauhawm taka Lucas Digne a tlawh avangin hnawhchhuah a ni a. Nicolas Jackson leh Raheem Sterling ten Chelsea tana goal khungna remchang an hloh hnuah Ollie Watkins-a’n Villa chakna goal a khung.

Newcastle United in Sheffield United lakah goal riat an khung a. Bramall Lane-ah Sean Longstaff, Dan Burn, Sven Botman, Callum Wilson, Anthony Gordon, Miguel Almirón, Bruno Guimarães leh Alexander Isak ten goal an khung.