Tata SK 612 LPS Pro Fight-ah boxer 282 an tel dawn a, Nilaini a inbuk zingah champion tawh panga an tel.
LPS Huan, Falkland Vengah an hriselna endik hmasak a ni a, tel tum a form thehlut boxer 395 atangin flyweight-ah 107 an tel dawn a, weight hrang panga zinga an tamna ber niin bantamweight-ah boxer 61, lightweight-ah 59, welterweight-ah 40 leh middleweight-ah boxer 14-in champion nih an inchuh ang.
Inrinni hian LPS Office, Zarkawtah fixture tar chhuah a ni dawn a, October 2, karleh Thawhtanni zanah LPS Arena, Falkland Vengah inhnek tan a ni dawn.
Nikum khan weight hrang pangaah boxer 211 an tel a, kuminah 72-in tel an tam zawk a, chutihlaiin middleweight-ah boxer 16 an tel tlin loh avangin semifinal lut chin hnenah chauh lawmman pawisa fai hlan a ni ang.
Flyweight-ah champion kawnghren lak kir leh tumin Pro Fight-a vawi nga champion tawh NT Lalbiakkima a inbuk a, nikuma final lut Samuel Lalthlamuana, semifinal lut Gregor Joseph leh C Zosangmawia bakah boxer beiseiawm Hminthanmawia, Lalmuankima, Donovan Lalremmawia te an tel dawn a, anni bakah hian a vawi sarih nan kum 41 mi John Lalhruaisanga a tel dawn a, a khelh tawhah a hnekpui tur a inlan loh avangin vawi khat a chak tawh.
Flyweight champion lai leh nikuma best boxer Laldinsanga’n bantamweight title a chuh ve thung dawn a, tunlaia hmasawn tak Omega Lalramdina leh nikuma semifinal lut David Laldanmawia te nen an awm ho a, kum 60 mi Jonathan Hmar, Vanbawng pawh 2017 hnua a vawi khat nan a inbuk ve leh a ni.
Lightweight champion lai Vanlalawmpuia a tel lo va, bantamweight champion lai Lalrinngheta’n a khelh thinna kalsanin lightweight title a chuh ve thung dawn a, nikuma final lut leh 2015 bantamweight champion HC Lalramfela nen awm dunin Pro Fight-a hriat hlawh tawh Lalremsanga leh J Lalhruaitluanga an inbuk bawk.
Champion lai C Lalhruaitluanga’n welterweight kalsanin middleweight-ah chona thar a hmachhawn dawn a, nikuma semifinal lut Lalruatzela Hauzel tan welterweight title beiseina a san phah a, sipai boxer Justine Renthei, National School Games-a champion tawh Vanlalruatpuia leh tawnhriat nei tha Zonunzira te nen an awm ho a, tunlaia boruak nei tak kum 50 mi Zomuanpuia Tlau, Kolasib bakah a vawi khat nan Bill Gates a tel dawn.
Middleweight-ah welterweight champion Hruaia a langsar a, Mizoram Fight Night champion F Lalthanliana Junior, Khelo India Youth-a tel tawh Vanlalhuala leh Mizoram Fight Night-a semifinal lut Daniel Beipasasa te nen title an inchuh dawn.