Aizawl: Govt. Aizawl North College (GANC) zirlaite chuan vawiina Cabinet meeting neih turah an college hmunhma chungchang put luh a nih theih nana hma la turin chief minister an ngen a, nimin chawhma khan zirlai thahnem tak CM office gate kawtah an pungkhawm.
Aizawl North College Students Union hruaitute’n an sawi danin, an college hmun hma chungchang ngaihtuah tura sorkarin a din, sorkar hotute leh zirlai pawl aiawhte telna ‘Search committee for establishment of GANC’ chu August ni 8 khan an thukhawm a, College hmunhma chungchang chu cabinet meeting-ah put turin an rel a, hetihlai hian cabinet meeting neih tura agenda ah erawh a tel ta si lo a, hei hi zirlai ten ngaithiam lo in nimin chawhma khan MZP hruaitute leh GANC Students Union hruaitute chuan Chief minister chu a pisaah an hmu a, cabinet thutkhawmah pu lut ngei turin an ngen a, CM pawhin hma a la lak tur thu a lo hrilh a.
Students Union hruaitute’n CM an hmuh lai hian zirlai za rual zette chu CM office gate pui kawtah an pungkhawm a, darkar chanve vel an punkhawm hnuah an trin darh a ni. North College zirlaite hian naktukah Cabinet thutkhawmah an thu thlen chu an ngaihtuah leh ngaihtuah loh an ngaichang dawn a, chumi a zir in hmalak zel dan tur rel an tum a ni.
Aizawl North College zirlai te hian an college hmun tur chungchanga sorkar hmalaknaah an lungawi loh avangin November ni 11,2022 khan Ramhlun leh Chanmari inkar kawng chu an lo dang chat tawh a, hemi tum hian sorkar hotute nen indawr in hmalak zel dan tur te an ruahman ho a, GANC hmun hma chungchang ngaihtuah tur committee chu din a ni.