A ni telin Mizoram inthlan kan hnaih zel a. Tum dang zawng zawng aiin inthlan kan ur lawk hma a. Kan political party te pawh inthlan campaign chhung a rei chuan sum sen a tam ti reng siin hma takah an campaign tan lawi a. Party ten hma an lak miau avangin mipui pawhin inthlan lam ringawt titiah an neih ta. MLA candidate tur tum danga an inzawnkhawm ang hunah khan tun kumah chuan bial tina an candidate tur an puang fel ta deuh vek mai.
Bial tinah kan political party te an fehchhuak sung sung a. Party te hian inthlan a la hlat deuh vangin nge ni, thu mum ngaihthlak tur an la chhakchhuak meuh lo. Party dangte dik lohna, a bik takin rorel lai tih dik lohte opposition lamin an aupui a. Ruling lam hian an party hnathawh that tawh lam aiin opposition ho beihna hi bei letin mizo hnam party bik an nih thu hi an changchawi rih ani ber a. Congress lam hian tum mumal deuh nei anga an lanna chu kriatianna humhim tura din leh an lo hum him thin dan an tlangaupui deuh ber a. Party tenau AAP hian candidate an siam tur leh tur loh an la puang lova. Bjp hian chuan sakhuana lam aiin development lam an sawi deuh ber thung.
Engpawhnise, mipui hi chuan tuna kan ram kalphungah hian lawmna tak tak kan hmu rih lo tih a chiang a. Chumi thawi dam tur chuan party tin hian kan ngeng chhun thu min la fah lo ni berin a lang thung. Ram changkang kalphung kan awt a. Kan intehkhinna berah pawh ram changkang hruaitute hmalak dan kan insawi khum a ni a. Mahse, ram changkang hruaitute kalphungin an kal lova. Tunhma kan politics kalphung an la pel chuang hek lo. Kalphung thar tia au pawh an thusawiah kalohung thar kan la hmu chuang lo bawk.
Hetianga uluk taka kan ram politics han thlir hian kan ram hruaitute hian hmasawn an mamawh tih a chiang a. Kan la hriat ngai loh kalphung thar min kawhhmuh se a va duhawm em. Inthlan hunah sawrkarna an lo chan chuan engnge an tih hmasak ber ang. Kan ram hmasawnna tura rahbi an rah hmasak tur lai tak min kawhhmuhin a indawtin an step hi min kawhhmuh sela. State sum leh pai dinhmun chhe lutuk siamtha tur hian khawi laiah tak nge ke an pen dawn. Sum inrenchem sawite hi a har lo. Mahse, tuna kan pawisa leiba tam lutuk rul thei tur hian khawi lai expenditure hi nge tih tawp an tum? Sawrkar hnathawkte an ti tlem dawn nge, department dinhmun an enfiah hmasa dawn? Kuthnathawktute dinhmun chhe lutuk chawikang tura an ke penna hmasa tur – day one atanga min hrilhfiah hi kan va mamawh em. Hmuia kaihhruai ringawt ram hi a tak ram min thlen tur hian inpuahchahna rintlak min han chhawp teh se. Chu chu mipuiin kan nghah mek niin a lang.