Aizawl: Mizoram sorkarin group B (non gazetted) chin la tura a din Mizoram Subordinate services selection board (MSSSB)-in 2020 atanga tun thlengin direct recruitment atan exam vawi 11 an buatsaih tawh a, mi 243 lak an ni tawh.
Human Resources Development Board (HRDB) vice chairman Dr L Thangmawia chuan nimin khan MINECO-a MSSSB office hi a tlawh a, MSSSB Chairman .Lalhuliana leh thawktu dangte’n an hmalakna an sawi danin, kum 2020 atang khan MSSSB office hi luahin hna an thawk tan a, hemi kum hian exam an buatsaih lo.
Sorkar kum 2021-2022-ah direct recruitment atan exam vawi 3 buatsaihin mi 32 lak thar an ni a, 2022-23 ah exm vawi 4 buatsaihah mi 79 lak thar niin, sorkar kum kal mekah exam vawi 4 an buatsaih tawh a, mi 132 an la tawh a. Direct recruitment bakah hian sorkar hnathawk tawh sa te an kaisanna tur hrang hrang exam te an buatsaih bawk a; hna hrang hrang 18 lakna atan exam buatsaih an la hmabak mek bawk a ni.
HRDB vice chairman nena an inkawmnaah hian MSSSB hotute chuan hna an lak chin chu hre fuh tawk lo an awm thin a, group B (non gazetted) chin hna lak an kalpui a, group C leh D an la lo tih an sawi a, exam an buatsaih apiangin diltu mi sing an chuang deuh ziah thin tihte, exam buatsaih nan sum leh pai sen a hau tak a, tum khatah cheng nuai 10 dawn te sen a ngaih thin thute an sawi a, hna lak an kalpui tawhah dik taka hna an lak thin thute, exam bei tute zingah pawh sawisel an awm an hriat loh thute an sawi a, hna hrang hrang laknaah exam hmachhawn tu zingah Curent news hre lo, in chhiar zau vak lo an tam thute an sawi a ni.
Dr L Thangmawia hian nimin vek khan MPSC office a tlawh chhunzawm nghal a, amah lo dawngsawngtu MPSC Chairman Pu J.C.Ramthanga’n a sawi danin, tun MLA term kal lai mek chhung hian Post hrang hrang 81 atan hna thar lak a ni a, post 6 atana advertisement an chhuah mek a; post dang 13 buaipui thar tur sawrkar lam atangin an dawng bawk.
Heng office pahnih a tlawhnaah hian thusawiin Dr Thangmawia chuan, Mizoram sorkar hnuaia hnalak chungchangah MSSSB leh MPSC te chu a la hming tha hle nia a hriat thute, sawiselna tur awm lo va a tling tlak zel la chhunzawm zel turin duhsakna a hlan thu a sawi a ni.