Dutch football thuneitu Royal Dutch Football Association chuan tun kartawp a Ajax Amsterdam leh Feyenoord te inkhel tihtawp hma chu vawiin tlaiah khelh chhunzawm a nih tur thu an sawi chiang.

Pathianni khan Johan Cruyff Arena-ah Dutch football a club inel leh inhal tak pahnihte an inkhel a. Feyenoord in 3-0 a hma an hruai laiin minute 56-naah inkhel tihtawp a ngai.

Inkhel tihtawp chhan hi Ajax tantuten khelmual chhungah halmawi leh thildang an vawm luh nasat vang a ni.

Ajax hi zaninah hian FC Volendam nen inkhel tur an ni a, hei hi sawn hlat a ni thung ang.

Chiang zawkin

Netherlands a club inhal ber pahnihte inkhel hi “De Klassieker” tia vuah a ni a, club pahnihte fans inkar chauh ni lovin player te thlengin boruak a sang thin.

Pathianni zana inkhelah pawh hian second half a tihtawp a nih hma in vawi hnih chawlh lailawk a ni hman.

Amsterdam police lam chuan Ajax tantute hi stadium pawnah pawh nawrlet ngai khawpin buaina an siam niin an sawi a. Stadium chhungah khelmual a luh an tum niin an sawi tel bawk.

Ajax hi league-ah 14-na ni mekin season hmasa khan pathumna an nih avangin UEFA Champions League an khelpha lova, hei vang hian fans te hi an lungawi lo niin a lang.

Hetihlai hian Ajax hian KNVB in inkhelh zawh tir a tum hun chu an pawmpui loh thu an sawi ve bawk a. Fixture inhawhtawt lutuk tur chu an tan a harsat dawn avangin dan anga hmalak theih dan an zawn tur thu an sawi.

Volendam pawh hian KNVB thutlukna chu an sawisel ve bawk a, an club in hemi chungchangah hma an lak zel dan tur an ngaihtuah ve tur anh sawi bawk.