English Football League Cup champion lai Manchester United in an lallukhum humhim turin bul an tan a. Premier League club Crystal Palace lakah harsatna tawk lovin 3-0 in hnehna an chang.
Kawng dik lam?
Old Trafford-ah United in third round atangin bul an tan a. Sponsorship avanga Carabao Cup tia hming vuah inelnaah hian round thumna atangin England atanga Europe huap inelna a tel clubte an inlan thin.
Season bul an tan that loh avangin United chanchin in sawi a hlawh a. Team chhunglam neuh neuh boruak a tam nia sawi niin khelmual chhungah an result in a zir thin lo.
Thawhleh zana inkhelah erawh coach Erik ten Hag-a’n a team a siksawi nasa a. Andre Onana, Casemiro, Hannibal Mejbri leh Diogo Dalot te chu an inkhel hnuhnung ber atanga bul tantu a rin chhunzawm te an ni.
United in nidang ang thovin bul an tan tha. An player-te tha a za a, ball an thunun tha zawk.
Nidanga an tlakhniam thuai thin laiin tun tumah an thawhrim rah an seng a, minute 21-naah Alejandro Garnacho chuan goal a khung.
Red Devils in ball awmze nei a an inpek kual thin rah an seng a, ball an chan a Palace goal lam an hnaih apiangin an hlauhawm thin.
Minute li hnuah corner hmu in Mason Mount-a vawrh luh chu Casemiro-a’n an goal hnihna turin a tauh lut a. Second half tan hnu deuhah Brazilian midfielder ball cross atangin Anthony Martial chuan an goal thumna tha takin a khung leh bawk a. Palace lamin chhanletna an nei lo.
United in tun season a football an khelh that tluan ber tum a ni a. A bikin Ten Hag-a hnuaia starting XI a hmun la chang tam lo hote an inlan chhunah an che tha.
Inhliam damkawr Mount-a’n assist a nei a, mi thar Sofyan Amrabat chu inkhel khaikhawmtu niin tunhnaia beisei pha lo Casemiro-a’n ngai awh lam a pan niin a lang.
Ten Hag chuan an chak hnuah, “Kan tan zan duhawm tak a ni. Kan kheltha a, inkhel kan thunun hneh hle.”
“Chak loh hi chuan lungawi lohna leh induhkhawp lohna te a awm thin a, hei hian boruak a ngawng ve thei. Mahse kan team chhung boruak a tha a, kan tangrual a, insiamthat tum reng kan ni. Hei hi zanin inkhelah a lang chiang hle.” tiin a sawi.
A sang an tla nual
Premier League kaithar club Luton Town in League One club Exeter City an hneh lova. Demetri Mitchell goal khung hmangin 1-0 in an tlawm.
Luton hian ball chang hnem mahse goal an khung thei loh an tuar a, Cauley Woodrow goal ban pet per an ui viau ang.
Wolverhampton Wanderers pawh third round paltlang lo zingah an tel a. Championship a che tha Ipswich Town in 3-2 in an hneh.
Ipswich Town in Omari Hutchinson, Freddie Ladapo leh Jack Taylor te hmangin goal an khung.