Chakma Autonomous District Council a CEM lo ni tawh Kali Kumar Tongchongya chu Aizawl district court spcial judge HTC Lalrinchhana chuan eiruk thubuaiah kum li chhung jail tang turin leh pawisa fai Rs 400000 chawi turin a chungthu a rel ta rup mai a. A pawisa chawi tur hi a pek theih loh chuan kum 2 dang tan belh turin a ti bawk. He thu hi a tuartu tan na hle mahse mipui tam tak erawh an lawm a. Politician eiru te ngaimawh thin ho chuan ram tan he thuremna hian awmzia a neih ngei an beisei a ni. Politician eiru hremna lamah bung thar kan kai ani an ti.
Politician te hi India ram dangah pawh eiruk thubuaiah thiam loh changa jail tang an lo awm tawh thin a. Kan ramah erawh hi chuan hetiang taka politician laka hremna hi a la thleng lova. Eirukna lian tham avanga hremna tawk hmasa leh hrem nat ber a la ni. Chakma district council hi tunhma atang khan sum eirukah hian an hming a chhe em em reng a. Sawrkarna an han siam atang hian sawrkar pawisa hi an in eiruk siak ni maia sawi a ni thin. Sawrkar pawisa chu thuneitute chuan anmahni hamthat nana an hman zawh vek avangin hmasawnna lam engmah a awm lo tluk hiala sawi a ni a. Inthlanna senso a vote hmuh nan an sum eiruk sa hmangin an inlei tling leh a. Chuti reng reng chu an kalphung a ni a. Mipui chu an rethei tlawk tlawk a ni ber mai. Tuna hetianga hremna lo chhuak hi mipui tan thu lawmawm a ni lo thei lo a ni.
Chakma district council a politician hremna ang hi kan ramah hian thleng ve thei tak maw. Kan politician te an hausa thur thur a. An hlawh enin engmah tham tak tak ani lova. Mahse, an hausa em em tho si. Politician leh politician te eiru ah an inpuh a. An hausakzia an insawi khum a. Mahse, an chungchang rel tur erawh court in a nei lem lo. Ka eiru miah lo ti ngam politician lah kan nei miah lo a tih theih hial ang. Hetiang anih avang hian eiruk tum, ram hmangaih vanga politics a lut anga insawi pawh an la pun belh zel a. An sum pawh an seng hreh lo. A let leh tur awma an hriat tlat vang a ni. Hman lawka sum harsa ve tak chhungkua, thuneitu an nih tak avanga hausa ta thur thur chu a taka hmuh tur an tam hle. Mahse, jail an tang ve ngai lova, an tan hlauh tur a awm tlat lo.
Tun tuma Chakma CEM thubuai chungchang hi an CEM hmasa in Governor hnena a hek, Governor in ACB lama a chhui tir tak thubuai kalzel a ni a. A bul tak chu hekna vang a ni. Hemi thuah hian kan Governor hi a fakawm hle. Chutih rualin huaisen taka thil dik lo hek ngam mihring an neih vang a ni a. Kan rama hausa thut thut politician eiru te hek ngam, opposition lama an awm laia sawrkar chelhtute eiruk ring taka aupui thinte hian Chakma district council CEM hlui, an CEM nilai hek mai ngamtu ang hi kan la nei ve lo chu ani phawt mai a. Kawng lehlamah chuan he chakma pa tluka dikna duh hi kan politician zingah an la awm lo a tih theih ang. Dik lo hrem ngam aiin remchang a awm veleh a eiru ve duh hlir hruaitu kan lo la nei ni mai hian a lang bawk. Chakma kan hmuhsit viau chuan huaisen lamah min khûm leh ta. Dik taka rorelna kalpui kan duh a, sawrkar tha siam kan duh anih chuan dik lo hrem hi kan tih hmasak makmawh a ni. Entawn tur chakma pa in min rawn chhawpchhuah sak hi kan zawm ve ngam a va hun em.