- Ruata
Hyundai chuan an premium hatchback lar, i20 bike N Line model chu hmelthar nen a thar an tlangzarh.
Hyundai i20 N Line thar hi trim hnih N6 leh N8 a awm dawn a. N6 manual transmission hmang hi Rs. Nuai 9.99 (ex-showroom) man atangin a intan ang a, N8 DCT variant hi Rs. Nuai 12.31 (ex-showroom) man thlengin a awm chho dawn a ni. Hyundai i20 N Line tharah hian danglamna neuh neuh a awm dawn a, a hma aiin thawm that hlek hlek a ni bawk a. He car lei tumte tan chuan a thar ngei hi a tha dawn viau a ni.
N Line ho hi Hyundai lirthei bika sports element nei, sports design lam pawla a design lam pawh an her rem a ni a. An lirthei hrang hrangah pawh kan hmu tawh tih chu kan hre theuh ang a, i20-ah pawh hian a vawikhat awmna a ni lemlo a. Tunah hian thlak danglam tlem tlem nen a thar an rawn tichhuak leh a ni. Hyundai i20 pangngai nena khaikhinin thil danglam liantham lutuk a awm lo a, a landanah leh thil thenkhata sports element an dah zeuh zeuh hi a ni deuh mai a, mawi erawh a mawi viau a. Mawi taka chei sa i20 ang te pawhin a sawi theih ang chu. A changkangin a dak nalh viau bawk a ni.
- Hyundai i20 N Line facelift-ah eng thil thar nge awm?
Hyundai i20 N Line tharah hian a landanah tihdanglam hret hret a awm a. A thil thlak liantham deuh chu 6-speed iMT gearbox a hman thin, 6-speed manual-a an thlak hi a ni a. A khawl lamah chuan a hmaa mi ang bawk 1.0 litre turbo petrol khawl, 120hp power leh 172Nm torque pechhuak thei a la hmang zel a. Tunah chuan i20 model bika turbo petrol khawl hmang awmchhun a ni a, variant dangah chuan an tichhuak ta rih lo a ni.
6-speed manual mai bakah hian automatic duh tan 7-speed DCT chu a hma ang bawkin duhthlan theihin a la awm bawk a. Sports exhaust leh suspension set up a la hman chhunzawm bawk a, a hnunglamah disc brake a hmang bawk a. Heng ho hi i20 pangngaiina a neih ve loh ho a ni.
- Hyundai i20 N Line pawn lam design
Kan sawi tawh angin a hmaa i20 N Line nena khaikhinin danglamna a tam lem lo a. A hma bumper ngai, parametric grille design awm tel chu a la hmang reng a. N Line logo a chuang leh bawk a, rawng sena a ti lang sports design tura chei a ni leh bawk a. A hnung bumper hi chhete hi a design an her danglam hret a, tail gate spoiler a nei bawk a. Heng bakah hian thil hrang hrang i20 N Line lo chhuak thin tawha kan hmuh thin chu kan hmuh chhunzawm leh bawk a ni.
Thil thar pakhat chu full-LED headlamp a nei hi a ni a. A hmaa chhuak khan LED projector headlamp a hmang a, 16-inch alloy wheel design thar a nei bawk a ni. Single-tone rawng chi 6 duhthlan tur a awm a, dual tone rawng chu sum chawi belhin duhhtlan theihin an dah bawk.
- A kentel hrang hrang
A chhunglamah hian all-black interior, red accent awm tel kan hmuh leh bakah N Line badging chu a seat leh steering wheel-ah te kan hmu a. Red ambient lighting, metal finish pedal leh N Line hman bik steering wheel leh gear lever a awm bawk a ni. Heng bakah a kentel hrang hrang te chu 10.25-inch touchscreen infotainment system with Apple CarPlay, Android Auto & OTA update, digital instrument cluster, wireless phone charging, cruise control, automatic climate control, single-pane sunroof leh 7-speaker Bose sound system te a ni a. Himna lamah chuan 6 airbags, three-point seatbelt with seatbelt reminder, Tyre Pressure Monitoring System (TPMS), reverse camera, automatic headlamp, electronic stability control (ESC) leh hill assist control te kan hmu bawk.
- A man leh elpui
VW Polo GT TSI an tihtawp takah chuan ‘direct’ taka elpui hi i20 N Line hian a nei rih lo a. A elpui hnaivai deuha ngaih chu turbo-petrol engine hmang tho Tata Altroz iTurbo a nih hmel a. Hei erawh hi chuan sports element hrang hrang i20 N Line-a kan hmuh ang a nei ve lemlo thung a ni.