Aizawl: ZPM leader Lalduhoma’n MNF party hi BJP sawrkar thawhpui tlattu an ni tih hi Mizo mipuite’n an hriat a ngai tih a sawi.
He thu hi Chalfilh bial chhung khaw hrang hrang a fan kualnaah a sawi a, Lalduhoma chuan,”Bible zirtir dan leh Mizoram rorelna kalphung chu thil inmil lo tak a ni a, MNF leh NDA thawk dun tlat mai te hi thil mak a ni, a ti a; Manipur buaina vanga Lok Sabha-a No Confident Motion chungchangah pawh khan MNF sorkar chu huai taka au chhuak angin lang mah se, Parliament-ah a duh lo tute lam an chhuah vek laiin Mizoram MP chu chhuak ve lo te zingah a tang leh tlat mai te kha thil mak a nih thu a sawi.
Duhoma chuan, congress party pawh tun hnaia Chakma area inthlanah BJP te nen an thawk ho a, Congress hruaitu lu Rahul Gandhi-a ngei pawhin Hindu party an nih thu a au chhuak hial tih a sawi a,”Kan sakhua a lo him theih nan mipui ten ngaihtuahna kan sen a ngai a, ZPM party chiah hi central party zawm ve lo, an thu thu a awm ve lo tur leh thutlukna mahni a siam thei tur kan ni,” a ti.
ZPM leader chuan, Mizorama sorkar ding lai chu MNF Party te an ni a, ZPM chu opposition party lian ber an ni mek tih a sawi a, Mizoram-ah mipuiin sawrkar lai an nin tawh reng rengin opposition party lian ber chu sorkar lai thlaktuah an hmang thin, a ti a, chuvangin ZPM te chu 2023 MLA election-ah Pathian leh mipui zarah sorkarna an chan ngei a rinawm ta hle a, party pawh sorkarna chang turin a inbuatsaih fel ta tih a sawi bawk a ni.