Aizawl: Reiek khua chu India rama tourism village tha ber ‘Best Tourism Village of India 2023’ atan puan a ni a, Gold Award hlan an ni.
Reiek khua hi Gold Award dawng thei India ram pum atanga thlan chhuah village tha ber panga zingah a tel a. Nimina New Delhi-a World Tourism Day lawmnaah Award hi sem a ni a, Tourism Minister Robert Romawia Royte chuan Reiek khaw aiawhin award hi a dawng a ni.
Best Tourism Village hi Central Nodal Agency for Rural Tourism, Ministry of Tourism hnuai a mi in a buatsaih niin, Best Tourism Village thlanna Competition ah hian application 750 chuang India ram district hrang hrang 315 leh State 31 atangin a lut a ni.
Best Tourism Village Competition hi kumin February ni 16, 2023 khan Ministry of Tourism chuan hawng tan in online- portal ah application hi submit a ni a. Stage hrang hrang paltlangin September thla tir khan khaw tha zual 80 thlan ani a.
Heng thlanchhuah khua te hi National Evaluation Committee hma ah Power Point Presentation pek a ni a. Video clip te siamin submit ani bawk. A tawpah a ti tha zual khaw 35 thlan chhuah ani a, Gold, Silver leh Bronze te pek anni a. Hetah hian Reiek khua hi asang ber Gold Award la thei panga zingah atel ta a ni.
Minister hi V Lalengmawia, Joint Secretary Tourism leh Lalrozama VCP Reiek leh mi pawimawh dang ten an tawiawm a ni.