Aizawl: September 27, 2023 (Nilaini)-a Mizoram sorkar Council of Minister thukhawmin Mizoram Journalist Pension Scheme 2023 a pawm ta chu September 28, 2023 (Ningani)-a Lawngtlai Press Club-a MJA Coordination Committee thukhawm chuan lawmawm an tiin, thinlung takin Mizoram sorkar chungah lawmthu sawiin resolution an siam.
Thutkhawma an resolution ah chuan, Mizoram Journalist Pension Scheme 2023 a hlawhtlin theihna tura hma latu hrang hrang – Chief Minister leh Finance Minister Zoramthanga, IPR Minister Lalruatkima, IPR Department officer te, Finance Department leh Law & Judicial Department hotute, leh journalist-te duhsaktute zawng zawng chungah lawmthu an sawi an tar lang bawk.
MJA member-te chuan Mizoram Journalist Pension Scheme hi a taka hman thuai a nghakhlel hle a, pension scheme hman thuai theih nan chak taka bawhzuisak zel turin Mizoram sorkar thuneitute an ngen nghal bawk.
MJA Coordination Committee thutkhawm hi MJA General Hqrs President C Lalrambuatsaiha’n a kaihruai a, General Secretary Lalrinmawia Sailo in MJA hmalakna leh chetchhuahna hrang hrangte a tar lang a. Treasurer C Lalhmachhuana’n sum dinhmun report a pe bawk.
Coordination Committee thutkhawmah hian nikum tira Siaha MJA General Conference-a khawmpui rorel bawhzui dan te an sawi ho a. MJA district budget chungchangte relin an sawi ho bawk.