- Mahmuaka Chhakchhuak
Kan Thalaite, ka thalaipuite chevel hi ni ruk chhung ngawt chu hmun leh hmunah ka thlir a, chu ka thlirna thu chu zep reng theih niin ka hre lo a, han puanchhuah ka chak tlat mai. Chu ka thlirna hmun leh hun chu Sept. 11 – 16, 2023 chhungin Vanapa Hall Hulhliapah a ni a, Mizo Writers Association (MWA) buatsaih Lehkhabu pho runpui neihna hmunah a ni.
Vanapa Hall Hulhliapah chuan Lehkhabu sang chuang tehmeuh hi ni ruk chhung pho chhuah a ni a, lehkhabu chi hrang hrang tih takah Pathianthu lam mai bakah, Love Story leh Cowboy bu leh lehkhabu dang tam tak hmuh tur a awm a, Autobiography lam pawh hmuh tur a awm bawk. Chung lehkhabu chi hrang hrangte chu a duh apiangte tana lei theih tura man tlawm zawka zawrhchhuah a ni a, lehkhabu hlu tak tak an niin a man nena inphu lo tak taka lehkhabu hlu pawh a awm. Lehkhabu pakhat chu Cheng sawm man lek a ni nain a hlu hle mai a, a tawp nia lei atana ka khek kha a tawp ni (Inrinni)ah chuan an lo inpho tak loh avangin ka lei ta lo kha pawi ka ti hle a ni. Chu lehkhabu hming chu LOOSHAIS AND MUNIPOOREES a niin phek sawm vel emaw chauh a ni a, lehkhabu hlu tak tur a ni. Lehkhabu manto tak tak pawh awmin Pu Chhuantea Zofa lehkhabu ziah MIZO LALTE CHANCHIN chu Rs. 1000/-a zawrh a niin helai hmuna lehkhabu man to ber a ni. Phek 1300 vela chhah a niin a man pangngaiah chuan Rs. 1500/- a ni a, tun tumah hian man tlawm zawka zawrh chhuah a ni.
Sawi tawh angin lehkhabu chi hrang hrang pho chhuah a ni a, Cowboy bu lam pawh awmin romantic leh novel lam pawh lehkhabu engemawzat a awm bawk a, Pathianthu hrilhfiahna leh nun kaihhruaina lam hawi lehkhabu pawh chhiar tham fe a awm bawk. Chung lehkhabute chu mitin tana lei theih tura phochhuah a ni a, mi zawng zawng tana buatsaih a nih angin Zirlai tan chauh emaw Sorkar hnathawk tan chauh emaw tih engmah a awm lo. Dawhkan 12 velah lehkhabu sang chuang pho a ni a, nula fel tak takin an lo nghak bawk a ni. Chutianga lehkhabu pho chhuah chu hla tak atanga rawn pan vang vang an awm a, a kianga kal remchan avanga rawn thlir an awm bawk. Tin, zawn bik neia rawn kal an awmin a hmuna duhthlang chawp mi engemawzat an awm bawk a, chutianga mi chi hrang hrang che vel chu nitinin ka lo thlir a, hmuhnawm ka ti em em a, a ruk taka lawmna min neih tirtu pawh a ni. A chhan chu, lehkhabu pho chhuah rawn thlirtu tam berte (ka sawi sual palh mai thei bawk nain) chuan lehkhabu tangkai leh tha lam an thlirin cheng sang chuang man lei haw ta ka hmu teuh a, lehkhabu rotling tur lam chi lei ka hmu teuh bawk.
Kan awmna hmun chu Pu B. Lalthangliana lehkhabu phona dawhkan leh Pu RL. Thanmawia kutchhuak lehkhabu phona inkarah niin Dr. JV. Hluna leh PC. Biaksiama ziah lehkhabu mai bakah Prof. J. Zorema ziah lehkhabu leh Dr. Rualthankhuma Chicken Soup-te chu a bu kima phona dawhkan chu kan nghak a, lehkhabu chi hrang sawm hnih emaw lai kan pho chhuak ve awm e. Prof. Zorema lehkhabu ziah rawn lam nalh nalh an awm a, Chicken Soup bu kima rawn lei an awm bawk a, a leitute lah chu kum upa lam ni loin ka thalaipuite vek an ni lehnghal a. Pu B-a kutchhuak phona dawhkan atanga lehkhabu leitute ngei pawh kum 20 – 30 inkar an tam ber bawkin ka hria a. MIZO CHANCHIN, cheng Za sarih man lai pawh a man a san tehlul nen leitu an tam riauin ka hria a, mak ka tih rualin lawmawm ka ti bawk. Kei lah chutianga mi hrang hrangin lehkhabu an thlira thenkhatte duhthlang mai loa an awm chu inthlahrung hauh loin ka lo kawhhmuh ve zauh zauh bawk a, Pu RL. Thanmawia kutchhuak lehkhabu tha tak tak leh Pu B. Lathangliana kutchhuak lehkhabute chu ka lo kawhhmuhin, ZIAK MITE PHOLENG bu ngei pawh chu thu leh hlaa tui mi tak tak tana neih ngei ngei chi a nihna pawh nitina ka sawi tam ber zing ami a ni.
Tlangval pakhatin Sialton Official ziahna a rawn zawng kha alawm nuam ka tih chu aw. Rang takin Kaphleia leh C. Thuamluaia HNUHMA tih bu chu ka kawhhmuh vat a, chutih rual chuan engnge chu thawnthu chu i ngaihven kher a tiha ka zawhna chu ‘Kha thawnthuah khan nula tlangval inngaihzawnna ngaihnawm tak a awm bakah C. Thuamluaia tawngkam tam takte kha hriat nawn fo ka duh avangin a bu ngeia kawl ka duh a ni’ tiin min chhang a, kei lah chuan inthlahrung lo sawtin ‘Ngawi teh, keipawhin Sialton Official kher hi chu ngaihnawm ka ti tawp thei lo a, TUTE NGE AN NIH? tih thupui hmanga R. Piangliana’n kum 1992 January thla chhuak THU LEH HLA-a kum 1974-a Aizawl Circuit House-a thil thleng Article a ziak kha vawiin thleng hian ka ngaihtuahnaah a awm reng a, C. Thuamluaia leh Dorothy an nih hi ka ring viau nain C. Thuamluaia lah chu kum 1959-ah a boral tawh bawk si a, a thawnthuah lah anmahni chiah chiah a ni bawk si a, a ngaihna reng ka hre lo a, remchangah ila titi teh ang’ tiin ka contact number ka pe ta ringawt a……
Nuam ka ti, hetianga lehkhabu sang tam tak mai hmun khat duh duh lei theiha pho chhuah a han ni hi a lawm berte zingah ka tel ngei ka inring. A hmingin lehkhabu phochhuahna dawhkan kan han nghak ve bawk tak nain mi che vel ka thlir ngun a, keimah ngei pawh chuan thu hman loin lehkhabu thlirin ka kal kual tam bawk. Lehkhabu buatsaihna man cheng sing tam tak ba nei reng chungin lehkhabu sawm thum lai mai ka nei thar a, min duhsak avanga an lehkhabu min pek pawh bu sawm lai a tling ngeiin a rinawm. Kei ang bawka nuam ti pakhat ka hriat chu Pu B. Lalthangliana hi a ni a, fiamthuin ‘Hetiang hun hi chu kan Birthday tluk hialin a nuam alawm’ a tih maina thinlung kha ka hriatthiampui phak dawn dawn mai. A dik alawm, lehkhabu ziak mi leh a chhiar mi tak tak tan chuan lehkhabu lei tura mi lo dawnsawn chu a nuam bawk em a, thil inchhirawm loh tak ni bawkin ka hria.
Lehkhabu Pho chhuah Runpui a han zo a, boruak a han reh tak dukah chuan khua a har thei hial mai a, mahnia Ina awm phei chuan thlalak kan thlir kan thlir mai a nih hi.