Aizawl: Power & electricity minister R Lalzirliana’n kum 5 chhungin Mizoram sorkarin state pawn atanga kawlphetha a lei nan cheng vaibelchhe 1835.39 a hman thu a sawi.
Minister Zira chuan Aizawl Press Club-ah press conference neiin 2019 atanga 2023 chhunga a department enkawl hnathawh te a puang a, 2019-2023 chhungin department in service connection 48770 a pek thar thute, tunah hian Mizoram pumah consumers 286896 an awm thute sawiin, kum 2019 atanga 2023 chhungin kawlphetha lei nan cheng vaibelchhe 1835.39 sen ral a nih thu a sawi.
Kum 5 chhung kawlphetha leina a hun taka pek theih loh avanga late fee an chawi chu cheng nuai 1514.30 a tlin thu a sawi rualin mipui nawlpuiin bill hi pe tha viau mah se kawlphetha hmang tam department leh mi dang te’n bill ba an ngah thin thute a sawi tel a, sorkarin subsidy atan sum tam tham tak a sen ral thin thute, kum 2020 atanga 2023 chhunga subsidy atana Mizoram sorkarin sum a sen belh chu cheng vaibelchhe 352.85 a tlin thu a sawi a ni.
Power minister chuan, kum 5 chhunga an hnathawh hrang hrang tarlangin, kawlphetha 5MW pe chhuak thei Tlawva Small hydel project chu 2020 khan hawn a nih thute, Kawlbem small hydel project pawh 2020 ah hawn a nih thute, kawlphetha 20MW siam chhuak thei Vankal solar plant pawh kumin february khan hawn a nih thute, heng bakah hian hmun hrang hrang transformer thar an thlak te, electric hrui an thlak thar takte a sawi a ni.
Mizoramin G-20 summit a thlena palai zinga mi Sekhon Family, USA aiawhin Mizoram hydel power plat siam theih ang ang te hmalak a duh thu Mizoram sorkar a thlen chu bawhzuiin anmahni sum senga power plant hmalak an in huamna chu bawhzui chhoh mek a nih thu a sawi bawk.
Zira chuan Land Resources, Soil & Water Conservation department hnathawhte sawi bawkin, tuihna humhalh bakah lei chung hang luang ral tur ven kawngah nasa taka hma an lak thute, kum 2019 atanga 2023 chhung khan RKVY scheme hnuaiah loneitute’n hlawk zawka thlai an thar chhuah theihna atan an mamawh hrang hrang sem chhuakin, cheng nuai 367.45 hman a nih thu a sawi.
NABARD RIDF loan hmanga chhungkaw 129 te tan rubber plantation hectare 220-a zau siam sak a nih thute, rubber huan neitute kawng hrang hranga tanpui an nih thute, SEDP hnuaiah Phase I ah chhungkaw 5680 te chu rubber , kuhva coffee leh Hmunphiahte chin tirin cheng nuai 2840 sen a ni a, phase II ah chhungkaw 5632 zet chu first installment pek an ni chhileh tawh tih a sawi.
Art & Culture department hmalakna sawi telin, Falkawn Zokhuaa in sak that a nih thute, Vanapa hall siam that a nih thu leh Lunglei district museum sak a nih thute a sawi bawk a ni.