French club Olympique Marseille chuan an coach Marcelino a ban hnuah an head coach thar atan Gennaro Gattuso an lalut.
Kum 45 mi Italian coach Gattuso hian nakkum June thleng contract a ziak a, season khat dang ziah belh theihna a awm.
Italy midfielder ropui thin hian, “Ka team thar kianga hnathawh hlan hi ka nghakhlel tawh hle a, kan hma a chona awmte hmachhawn turin kan inpeih tawh.” tiin a club thar a zawm hnu hian a sawi.
Spanish coach Marcelino hi French club tantute nen an inkar a that loh avangin a bang a. Marseille fans te hnen atangin vaukhanna a dawng nual niin an sawi a, hei vang hian club a chhuahsan.
Marseille hi Ligue 1-ah pariatna an ni mek a, October 5 hian Europa League-ah Brighton & Hove Albion nen an inhmachhawn dawn.
Gattuso chuan sawi belhin, “He club hi European football-ah an thawm a ring a, chak duhna leh player leh fans te bakah club pumpui anga theihtawp chhuah thin an nih avangin an lar. Stadium hlun takah, boruak ropui tak an neih thin avangin an lian a ni.” a ti.
Gattuso hi kumin January a Valencia a chhuahsan hnuah hna dang a la chelh leh lova. Hemi hma hian Italian football-ah tunhnai kum 10 chhungin Pisa, AC Milan leh Napoli te a lo enkawl tawh.