An club social media lamah amah tihelna video pholan zuai a nih lungawi lo mahse striker Victor Osimhen chuan a inkhelh leh hmasak berah goal a khung a. Udinese lakah 4-1 in Serie A champion lai an chak.
Nilaini zana Stadio Diego Armando Maradona a inkhelah hian Osimhen hian an goal hnihna minute 39-naah a khung a. A goal khung hnuah erawh a lawmna a tilang duh lo.
Napoli hian tunkar khan an TikTok-ah video an dah a, hetah hian Pathianni zana penalty khung lo Osimhen tihel zawngin video hi an siam.
Osimhen-a agent chuan Napoli lakah hian dan anga hma lak thlengin a vau.
Napoli head coach Rudi Garcia chuan club lamah hetiang boruak hi awm mahse Osimhen hi club tana a inpek tlat thu a sawi nawn a. “Chiang takin hei hi ka sawi ngam, Victor hian he kawr ha chunga inkhelh hi nuam a ti a, kan team-ah hian a rilru leh theihna zawng zawng hi a seng a ni.”
“Victor nena kan inkar hi a tha hle a, zaninah goal a khung pawh ka lawmpui. Bologna nen kan inkhelh zawh khan kan zavaiin kan lawm lova, kan thin a rim hlawm vek. Victor pawhin penalty a khung loh vang khan lawm lohna a nei hnem.”
“Football leh pawn lam thilah pawh tunhnaiah chinfel tur kan nei hnem a ni.” tiin a sawi.
Napoli tan Piotr Zielinski chuan goal hmahruai penalty atangin a khung a, Khvicha Kvaratskhelia leh Giovanni Simeone ten goal dang an khung.
League a la chak vek Inter Milan chu a vawikhatna atan an tlawm a. Sassuolo in San Siro-ah 2-1 in an hneh.
Sassuolo tan Nedim Bajrami leh Domenico Berardi ten second half-ah goal an khung.
AC Milan in Noah Okafor, Fikayo Tomori leh Ruben Loftus-Cheek te goal khung hmangin 3-1 in Cagliari an hneh ve bawk.