Aizawl: Champhai South bial chhung Dilkawn Congress Unit huaihawtin Dilkawnah Nilaini zan khan Street Campaign neih a ni a. He hunah hian Champhai South bial a Indian National Congress (INC) atanga ding tur Dr. Lallianchhunga, MPCC Thupuangtu leh Gen.Secy ni bawk chuan thu a sawi.
He huna thusawitu Dr.Lallianchhunga chuan, “MNF ten an party a lut tura mipui an thlemna hmanrua SEDP pawisa hi mipui pawisa a ni a, MNF pawisa a ni lo. Inthlan hun an rawn puan hunah SEDP hi sem theih a ni tawh dawn lo va. Tuna Second Phase (Phase 2-na) dawng mek te hian Rs. 25,000 bak an dawng hman tawhin a rinawm lova. SEDP hun a liam thuai dawn a, mipuite kan zalen tep tawh a ni,” a ti.
MPCC Spokesperson Dr. Lallianchhunga chuan, “Congress sorkar hunlai khan NLUP kha MNF te, ZNP (tuna ZPM ni ta) leh MPC party mi te pawhin an dawng a. An eizawnna thlan a zira cheng nuai 1 aia tam tanpuina dawng chhungkua pawh an awm a. COVID hripuiin Mizoram min nuai laia Aizawl khaw mipui thlai (vegetable) a min chawmna tam zawk kha NLUP hnuaia tanpuina dawng chhungkua te thawhrah a ni a, Aizawl mipui mak tih khawpin thingtlang atangin thlai hring a lo lut ruih ruih mai a nih kha. Mi rilru ngilte tan chuan NLUP kha a hlawhtlinna sawi tur a awm teuh a ni” a ti bawk.
Mi taima leh dinchhuah tuma theitawp chhuahtute chu Tang Puihna Rs.2,00,000 (cheng nuai 2) in an tanpui leh dawn tih sawiin Dr Lallianchhunga chuan, “Loneitu kuthnathawktute, lu mettu te, chawhmeh zuar te, thir chhertute, dawr siam te, pheikhawk chhe siamtute, beauty parlour dawr siam te, ralchah dawr (Online Marketing) hawngtute, mistiri te leh eizawnna hrang hrang neitute, din chhuah tuma theihtawp chhuahtu zawng zawng te chu tang puihna hmangin an fairel bel thleng turin Rs.2,00,000 in kan tanpui leh dawn a ni,” tiin, sorkar laipui atanga sum lo kal hi a hmang thiam leh a ngaihna hria te tan chuan mipuite fairel bel thleng phak turin a dah theih a ni. TANG Puihna chu sem policy a nih loh thu a sawi bawk.