Aizawl: ZPM Aizawl North III Block in nimin khan Chanmari YMA Hall-ah Block Conference an hmang a, an leader Lalduhoma’n ZPM chu mipuiin sorkar tura an rin party a nih thu a sawi.
Duhoma chuan, Mizoram political history thlirin sorkar tur chuan thil pahnih a ngai a, a pakhatnaah chuan sawrkar atana an duh party nih leh sawrkar tura an rin party nih a ngai a, chu dinhmun chu ZPM in an lo luah ve ta tih a sawi a, hei hi party dang pawhin an pawmpui nia a lan thu a sawi.
An elpui party te’n an policy an sawi hman lo a, ZPM chu an buaipui ber a ni ta tih sawiin, ram hnuk khawih lem lo, thil eng emaw hlek hriat fuh loh a awm pawhin dawt sawi hmangah an party chu an chhuah zel thute, Unit atanga Headquarters hruaitu thlengin an fimkhur deuh deuh a ngai tih a sawi.
ZPM Working President leh Aizawl North – III ZPM Candidate ni bawk K Sapdanga pawhin mi thar lawmluh paha thu sawiin, an elpui party te chuan sum chakna hmanga hnehna chan an tum thute, party sum pawh ni lo, sorkar sum SEDP te, SASCI te chu vote zawn nan bial tinah ualau takin an sem mek tih a sawi a, SEDP sem hi Election Model Code-in a nangching ang tih an hlau a, an khawngaihthlak tak zet tih a sawi.
ZPM Aizawl North III Block conference hi Block President Zoremsiama’n a kaihruai a, Aizawl West – I ZPM Candidate Lalnghinglova Hmar pawhin thu a sawi bawk a ni.