Premier League club Chelsea chuan an defender Marc Cucurella chu January thla hian hralh an phal a, lakluh tum a dawrtute dilna ngaihthlak an inhuam.
Brighton & Hove Albion atanga Pound maktaduai 62 a an lakluh Cucurella hi Nilaini zana a club hlui an hmachhawn tumin tun season a vawi hnihna atan chauh a inkhel a. Premier League-ah la inkhel miah lovin club-ah a hma hun a chiang lo mek.
July thla khan Spanish full-back hian a club-ah cham chhunzawm zela khelhna hmun chang tura beih a duh thu a lo sawi tawh a. Nimahsela Mauricio Pochettino squad-ah a inkhelh tam loh avangin a rilru a thlak dawn niin an lang.
Kum 25 mi hi Manchester United in nipui bazar inkhar dawn lamah khan loan a hawh an duh a, mahse inremna an nei thei lo.
Spain lamah Real Madrid chuan tlarhnungah inhliam an ngah avangin January thla hian loan a hawh theihdan an dap nia sawi thawm a awm.
Hetihlai hian Chelsea hian an sum hman nasat chhawk nan a nghet a chhuak tura hralh chu an duhdan nia ngaih a ni thung.