Aizawl: World Bank sum cheng nuai 397 seng a sak Hnahthial Chief Medical Officer’s office building thar chu nimin khan Health Minister Dr R Lalthangliana’n a hawng.
Hawnna inkhawmah thu sawiin, Dr Thangtea chuan, District tihpuitlinna kal zelah Hnahthial District in Chief Medical Officer’s office building a nei ta chu lawmawm a tih thute, District tan thil chhinchhiahtlak tak a ni tiin District CMO leh a thawhpuite bakah Hnahthial mipuite a lawmpui thu a sawi.
Health Minister Dr Thangtea chuan Health Department hmachhawp hrang hrang a tarlang a, District thar 3 te tan District Hospital sakna tur cheng nuai 1700 theuh ruahman a nih thu te, Champhai leh ZMC ah Critical Care Block bun a nih dawn thu te leh JICA sum a sak tur Mizoram State Cancer Super Specialty Hospital-te pawh a lawmawm hle rualin thawktu turah indaihlohna a nasa hle a, Mizo thalai rualte chu nasa leh zuala tang turin a fuih a, Ram leh Hnam tan theihtawp chhuah tlang turin kalkhawmte leh thalai rualte a sawm a ni.
Chief Medical Officers Office Building hi World Bank sum cheng nuai 397 senga sak a ni a, Lushai Engineers te thawh niin December ni 17, 2021 khan sak tan a ni. Mizopa chhiara chhawng li a sang niin, square meter 1224 a zau a ni a.
Hnahthial District Hospital hi tunhnaiah thuam that niin nausen pianghlim atanga thlakhat la tlinglo te enkawlna bik New Born Stabilisation Unit dah a ni a, Ultrasound, Blood storage centre leh Thyroid function test, Truenat, CB NAAT leh thisen test hrang hrang tihna khawlte a awm tawh a ni.