Manchester United defender Lisandro Martinez chuan a ke a hliam a neih tawhsa a tih nat belh avangin hun engemaw chen a chawl dawn.
Kum 25 mi Argentina international hian April thla khan kephah ruh a tih tliah avangin season a khel tluan thei lova. Tun season-ah bul tan thei mahse a tihnat belh leh avangin thla hnih atanga thla thum vel a chawlh a ngai dawn.
A club Manchester United chuan Martinez chungchang hi sawifiahin Arsenal nen an inkhelh tumin a ke hi a tihnat belh a. Hun engemaw chen chawlin enkawl tawh nimahsela hun rei zawk enkawl a ngai dawn tih an sawi.
“A hliam neih tawhna a tihnat belh leh avangin inenkawlna mumal zawk a dawn theih nan hun engemaw chen a chawlh a ngai dawn a. Hmalam pana kal zel dan tur a dinhmun thlirin ngaihtuah zel a ni ang.” tiin a sawi.
Manager Erik ten Hag chuan, “Ama tan leh team thil pawi tak a ni. A fit that loh avangin danglamna a tam a. Tun season a Licha leh season hmasa a kan hmuh Licha te an inthlau hle.” a ti ve bawk.