Napoli chuan an striker Victor Osimhen tihelna chungchangah an insawifiah a, social media a an video tarlan chu an striker tihel leh tih lungawi loh tumna nei a ti an ni lo tih an sawi. Mahse Italy champion lai hian Osimhen lakah hian thupha chawina erawh an sawi tel lo.
Napoli social media account-ah Nigeria striker hian Bologna laka penalty a khung loh lai video chu tarlangin amah tihel zawngin an siam danglam a. Hei vang hian player hi lungawi lovin a agent chuan club lakah hian dan anga hma lak thlengin a vau a ni.
Napoli chuan thuchhuah an siam a, hetah hian, “Club chuan Victor hi tih lungawi loh a tum lova, hetiang anga ngaih theih tura ti a ni lo.” tiin an sawi.
“Hemi chungchanga ngaihdan dik lo a awm loh nan Napoli chuan Victor tihel leh tih lungawi loh tumna lam a ni lo tih a sawichiang duh. Victor hi club tana theihna pawimawh tak nei a ni.” an ti.
“Kan thusawi nemngheh nan club hian hmun dang atanga Victor ngaihvenna zawng zawng hi a hnawl a, hei hian kan dinhmun chiang takin a tilang.” an ti bawk.
Napoli manager Rudi Garcia chuan Udinese laka 4-1 a hnehna an chan tumin Osimhen hi an club tan a inpe pumhlum a ni tiin a lo sawi tawh a. He inkhelah hian Osimhen hian goal a khung a, a goal khung erawh a lawm duh lo.