Italian football club AS Roma tan season bul tan chhiat chu a la kaltluang a, tun season league inkhel vawi ruk an hmachhawn tawh atangin a vawi thum nan an tlawm a, Genoa in 4-1 in an hneh.
Stadio Luis Ferraris a Serie A inkhelah hian Genoa in an huntha neih an chhawr tangkai zawk thin a. Player malkhai a nei tha zawk AS Roma in ball chang tam mahse awmze neiin an hmang lo.
Genoa tlarhnung a nghet a, Roma in chance tha insiam an harsat. Lehlamah Genoa in remchang an hmuh apiangin hlauhawm mumal tak an siam thei thin.
Minute 5-naah Albert Gudmundsson chuan Genoa goal hmahruai a khung a. Hei hi minute 22-naah Roma in Bryan Cristante hmangin an sut a, Rome khaw club an phur.
Mahse Genoa tlarhnung an sut tlang hleihtheih loh an tuar a, minute 45-naah Mateo Retegui chuan mualneitu lam goal hnihna a khung.
Second half-ah pawh inkhel a danglam lova, Roma an tlahniam zawk.
Minute 74-naah Morten Thornsby hmangin Genoa in goal khungin huntawp hma in Junior Messias chuan an goal hnuhnung ber a khung leh bawk.
Roma hi league-ah point nga chiah hmu in 16-naah an awm mek a. An coach Jose Mourinho chuan coaching a luhchilh hnua a team in season bul an tan chhiat ber tum an hmang mek niin a sawi.
Mourinho hnuaiah hian AS Roma hian kum 2022-ah Europa League Conference a chawi nghal a. Kum 14 chhunga Italian club in trophy an chawi hmasak ber a ni.
Season liamta khan league-ah parukna niin Europa League final an khel bawk a, tun season-ah erawh beisei an pha lo.
“Coach ka nih hnua season bul ka tan chhiat ber a ni. Mahse Roma hian a zawnin Europe huap inelna final an khelh ka la hre ngai lo.” tiin a sawi.
“Kan squad neih hi tun season a kan hman tur a ni a, hmalam kan thlir a ngai a, indawmkunna hun a ni lo. Rim takin kan hmalam a inkhel hmachhawn turin kan thawk ang.” a ti.