Constitution Club, New Delhi-ah inthlan vote thlakna khawl, Electronic Voting Machine khawih chingpen chungchangah eptu party hruaitute chu an thukhawm a, Thawhtanni hian ziakin Election Commission hnenah Lok Sabha inthlana hmang lo turin an thlen dawn.
Nimina ‘Save the Nation, Save the Democracy’ meeting an tih mai hi Congress-in a huaihawt niin EVM chungchang hi anmahni ang bawka eptu party dangte nen an sawiho a ni.
EVM hi engtin emaw khawih danglam leh tihchingpen theih nia ngaiin eptute hian Election Commissiosn hnenah paper ballot hmanga Lok Sabha inthlanpui lo awm tur hi neih ni se tiin an thlen tawh a; mahse, Election Commission hian an thu thlen hi a hnawl tawh thung.
Meeting-ah hian Congress chief Rahul Gandhi, Andhra Pradesh chief minister Chandrababu Naidu, NCP chief Sharad Pawar, Loktantrik Janata Dal (LJD) chief Sharad Yadav, and senior Congress hruaitu AK Antony te an tel.
Nimina meeting an neih hma hian eptu party-te chuan EVM hi khawvelah ram pahnih/thum emaw chauhvin an hmang a, a lo hmang tawhte pawh ballot paper system-ah an kir leh vek tawh zawk niin an sawi.
Congress chuan Lok Sabha inthlanpui atan hun a tam tawh lo va, Election Commission tan pawh paper hmanga inthlan buatsaih chu thil buaithlak a nih theih tawh dawn avangin a chanve (50%) tak chu voter-ten an rinhlelh loh nana hmang turin an duh tih an sawi.