MNF party chuan India ram state zingah Mizoram chu leiba nei tlem ber dawttu a nih thu an sawi.
Inrinni khan MNF media & Publicity department chuan Aizawl Press Club-ah thu thar thehdarhtute an kawm a. An General Secretary VL Krosshnehzova chuan mipui rilru hruai kawi tawk vela Mizoram leiba chu GSDP percent-a chhutin a tam ber tia an sawi fo thin chu tha lo a tih thu a sawi.
State pachhia leh thawhchhuah nei tlem Mizoramah hian sum leh pai dinhmun ropui beisei tur a awm loh rualin, Mizoram chu India ram state leiba nei tlem ber dawttu a ni chu ropui a tih thu a sawii a. “Leiba hi percentage-a rulh a ni ngai lo va, leibat zat (total outstanding liabilities) zawk hi a tahtawla rulh tur chu a ni,” a ti.
VL Krosshnehzova chuan January 16, 2023-a Reserve Bank of India (RBI)-in Annual Publication a tihchhuah, ‘State Finances: A study of Budgets’ statement-ah India-ah Sikkim leh Mizoram ten leiba an nei tlem ber tih a sawi a. Sikkim leibat zat chu Rs vbc 9,655.7 a nih thu leh Mizoramin Rs vbc 10,217.1 leiba a nei niin a sawi.
State sum dehchhuah (GDP) atanga leiba chhuta nau piang hlim pawhin chuti zat an ba tihte hi sorkarin statistics chhut dan a nih loh thu sawiin VL Krosshnehzova chuan, “Tute emawin sorkar mek party beihna tura an analyse a ni tlangpui. GSDP chhutchhuak tur hian System of National Accounts-in guidelines a siam angin approved methodology bik a awm. Mi mal leh pawlten an lo chhut hi pawm a ni lo va, rintlaka ngaih a ni lo,” a ti.
Sorkar kum kal mek, 2023-2024-ah state thawhchhuah (State’s Own Revenue) chu sum hmuh zawng zawng, Total Revenue Receipt atanga zaa 17.24% tling thei tura chhut a ni a, sum thawhchhuah zawng zawng (consolidated receipt) atanga erawh chuan zaa 13.94 a ni thung dawn a. Kum 2023-24 chhunga GSDP atanga tehin Gross Fiscal Deficit chu zaa 3.47 ni tura chhut a nih thu leh Primary Deficit chu zaa 1.63 a ni a. Kum lo kal tura sorkar leiba tling khawm chu Rs vbc 13,584.80 ni tura chhut a nih thu leh debt/GSDP ratio chu zaa 37.84 a nih tur thu a sawi bawk.
Pawisa puk (borrowings) chungchangah finance commission (FC) rawtna angina Normal Borrowing Ceiling (NBC) limit pawh GSDP pawh zaa 3.5 tuk a nih thu sawiin, “State sorkarin a duh zat zat pawisa a puk thei lo va, a dinhmun mil tawk zelin a puk mai thin zawk a ni,” VL Krosshnehzova’n a ti.
MNF Media & Publicity general secretary chuan sorkar sum bat hnem dan hahipa sawi a, phurrit lian tak nei anga sawi chamchi a, sorkar siam leh tute tan pawha huphurhawm ang hiala sawitute hi chuan Mizoram harsatna phurh chhuah an huphurh nia an ngaih thu a sawi a. Chutiang taka huphurh chung sia sorkarna siam ve tuma tha tawp an chhuah lawisi chu, heti taka sorkar ve an chak hian sum dinhmun chhiat lem lohzia a tar lang chiang hle niin a sawi.
Pathian leh mipui zarah sum chungchanga harsatna kan tawh mek phurh chhuah MNF chuan a huphurh hran lo tih sawiin VL Krosshnehzova chuan, “Hripui nasa tak leh harsatna tam tak pawh Pathian puihnain a lo sual chhuak tawh a. Mipuiten harsatna karah pawh sorkar an thlawp tlat avangin kan tanrual phawt chuan harsatna sutkian hi thil theih a ni tih hi a pawm dan nghet tak a ni,” a ti.