Rimawi khawvela rapper lar chhuak hmasa ber ziangmi leh langsar, tun thleng pawha a huhang la na em em Tupac Shakur kahhlumna thubuai kel zelah Duane ‘Keffe D’ chu police-in an man.
Las Vegas-a inkahna hi September 7, 1996 zan khan a thleng a, hetih laia kum 25 mi Shakur thahna chhuina kal zelah kum 27 hnu-ah a hnar kaitu nia hriat hi an hreng thei ta a ni.
Shakur leh Biggie Smalls kahhlumnaah Davis hi silai hmetpuaktu leh tharum thawhtu ni lo mah se, kaphlum tura thupetu leh he inkahna thlen nana ruahmanna siamtu lu ber nia hriat a nih vanga man a ni a, thubuai ngaihven hlawh tak mai, kum sawm thum dawna chin fel a ni chho tur hi thil mak tak a tling.
He thil thlen hun lai vel leh hemi hmalam hret hian Shakur-a music label Death Row Records leh Bay Boy Records te inkarah inerna nasa tak a lo awm daih tawh a, 1990s lai hawl vel phei kha chuan pawl pahnih te inepna leh inerna na tak vang hian kut inthlakna leh thisen chhuahna hial a thleng thin a, Shakur leh Biggie te pawh hian hemi rah hi an tuar ta ta a ni ber.