Serie A champion Napoli in league table chunglam an pan chhunzawm a. Lecce lakah goal li khungin hnehna pawimawh an chang.
Inrinni zana Stadio Via del Mare a inkhelah hian Napoli in an striker Victor Osimhen chu bul tan tir lo mahse second half a luhtir a nih hnu lawkah goal a khung.
Mikhual team hian defender Leo Ostigard hmanga goal hmahruai khungin second half-ah Gianluca Gaetano leh Matteo Politano ten huntawp hma in goal an khung belh a, 4-0 in an chak.
Osimhen hi kar hmasa khan club in social media lama amah tihelna video an tarlan avangin club nena an inkar a tha lo nia sawi mek a ni a. Coach Rudi Garcia chuan bench a an dah chhan chu hetiang thil kaihhnawih ni lovin an inkhelh hmabak te thlir a squad an inthlak kual duh vang tih a sawi.
“Player-ten kan inkhelh hnuhnun ber a la rei lova, ni sa leh khawlum kara inkhel kan ni bawk. Hei vang hian inthlak kual hi a awm tur a ni.” a ti a. Tunkarah Champions League a an inkhel tur an thlir tel tih a sawi.
Inkhel dangah league hmahruaitu Inter Milan in second half-ah striker Lautaro Martinez an luhtir a, goal li khungin 4-0 in Salernitana an hneh.
AC Milan in Christian Pulisic leh Noah Okafor te goal thun an chakpui bawk.