Aizawl: Zo Re-unification Movement (ZRM) chuan Inrinni khan Aizawl Press Club-ah chanchinbu mite an kawm a, an covener T Lalhmachhuani (Mimi) chuan kumin MLA inthlan neih turah party mala sorkarna siam thei an awm dawn lo tih a sawi.
Mimi-i chuan an pawl ZRM-in kumin 2023 MLA inthlanpui lo awm turah candidate tur trawngtraiin an zawng mek tih sawiin, candidate tur thenkhat chu hual lawk te pawh an nei tawh a, an puan chhuah vat tur thute, bial 40-ah candidate neih vek an duh a, Pathian rorel ang zelin an kal dawn tih a sawi a.
Kumina MLA inthlanpui neih turah political party zingah party mala sorkarna siam thei an awm dawn lo tih sawiin, chumi karah chuan ZRM chu ‘deciding factor’ a ni thei tih leh sorkar siam tuah ZRM a tel dawn tih a sawi.
ZRM covener chuan an pawl manifesto puang bawkin, Zofate mahnia ro inrel tura hma laka, Pathian lalram a taka din te, khawvel hmun hrang hranga Zofa awmte inpumkhata an awm theihna tura council/forum din te, Zofate intodelhna atana hmalak, education leh health lama hmasawnna atana ke pen leh khawvel hnam tinte hnena chanchin tha hrilh te chu an hmalak tumna a nih thu a sawi.
An pawl au hla chu ‘Krista tana rinawm’ tih a ni a, Bible chang an innghahna chu Johana 8:32, “Thu tak in hria ang a, thutak chuan bawih a ban ang che u,” tih a nih thu a sawi bakah ZRM-ah chuan Zofate zawng zawng an len vek thute, ram leh hnam veitu apiangte khawvel hmun hranga Zofa awmte inunauna leh inpumkhatna duhtu apiangte tan tel theih a nih thu a sawi bawk.
ZRM Covener Mimi-i hi evangelist C Zairemmawia leh MNF-in zalenna a sual laia war secretary thin, Vanlalngaia ten an tawiawm a ni.