Kum tam tak chhung an lo zawn tawh, French serial killer rapthlak tak pakhat chu military police officer a lo ni reng tih hriat chhuah a ni a, amah intihlumin pawikhawihtu a nih thu a lehkha hnutchhiahah a ziak.
French chanchinbute chuan Francois Verove-a niin an sawi a, Nilaini khan chhim lama Le Grau-du-Roi khua, Mediterranean tuipui kamah a ruang hi chhar a ni.
Kum 59 mi, Verove-a hian a intihhlumna bulah hian lehkha hnutchhiahin mi thattu, a hming lema Le Grêlé an tih chu a nih thu a inpuang niin chanchinbute chuan an tar lang.
Verove-a DNA hi pawikhawihnaa an hmuh DNA-te nen pawh a inhmu thlap niin prosecutor-te chuan an sawi a, endikna dang pawh an kalpui zui zel ang.
Le Grêlé-a hi kum 1986 atanga mi pali thahnaah leh pawngsualna eng emaw zatah a titua chhal a ni a, Verove-a a inpuan hma zawng hian chhui chhuah a ni lo.
Pawikhawihna thleng zingah hian kum 1986-a Paris-a hmeichhe naupang kum 11 mi, Cécile Bloch-i thah leh pawngsual pawh a tel.
Le Grêlé-a thah nia sawi dangte hi mipa pakhat, kum 38 mi, Gilles Politi; kum 20 mi German hmeichhia, Irmgard Müller leh kum 19 mi, Karine Leroy te an ni.
Verove-an lehkha a hnutchhiatah hian Le Grêlé-a an zawn mek chu a nih thu a ziak a, a mi thah leh a chet dan kimchang erawh engmah a ziak lo niin French chanchinbute chuan an sawi.
French chanchinbute chuan Verone-a hi a hna atangin a chawl tawh niin an tar lang a. Le Grêlé thubuaiah hian police leh military police hlui leh tanglai eng emaw zat thu zawh fiah tura koh a nih a nih hnu lawkah a chin hriat lohvin a awm a. An zawn hmuh chuan a lo thi tawh a ni.
Verove-a hian fa pahnih a nei tawh nia sawi a ni a, a chhungte chuan hetiang a ti tih engmah an hriatpui loh thu an sawi.