Aizawl : MPCC President Lalsawta chuan ram leh hnam enkawl turin hruaitu tha mamawhna a hmanhmawhthlak tawh tih a sawi.
Seasawng Venglai Community Hall-a Chalfilh bial Congress Joint Block Conference Inrinni-a a hmanpuinaah MPCC President Lalsawta chuan, “Pathianin ram leh hnam, mipui min pe. Heng enkawl tur hian a ngaihna hria sorkar tha, sorkar felfai leh a tul ang zela sorkar che chhuak thei, eirukna awm lo sorkar kan mamawh a. Chumi tur chuan hruaitu tha kan mamawhna hi a hmanhmawhthlak tawh a. Hei hi Congress hian kan ti thei, kan rintlak tih kan hria,” a ti.
Lalsawta chuan ramin sum leh paiah thuk takin harsatna a tawk a. Nau piang hlim pawh leiba sing tel nei sa angin harsatna an tawk a. Chutiang karah thalai nunna chan hriat tur tam lutuk leh nitin maia ruihhlo nuai tel man a ni a. Mizote hi hnam tlemte an ni a, tute pawh nise hun lo taka boral hi an uiawm avangin, thalaite hian kawng dik an zawh vat a ngai tawh takzet tih a sawi. Pheikhawk lei turin bun chhin a ngai a. Mahse, electric erawh eng nge a ni tia khawih chhin chi a ni lo tih sawiin Lalsawta chuan, “Ram enkawlna hi enchhin chi a ni lo. A nghawng a na lutuk. Khawvel ram hrang hrangah sorkar an enchhin ngai lo. An hriatchian sa an thlang thin. Chuvangin, kan ram, kan hnam, kan sakhua humhim turin Congress Party a sorkar a ngai,” a ti.
Inkhawm hi ADCC General Secretary K Siamliana’n a kaihruai a, kumin MLA inthlan lo awm tura Chalfilh bial Congress candidate Vanneihthanga Vanchhawng pawhin thu a sawi a ni.