Atletico Madrid in season thar bul tan tha chiah lo mahse table chung lam an pan a. Goal hnih an chhuah hnuah goal thum khungin 3-2 in Cadiz an lehthal.
Pathianni zana Cívitas Metropolitano a inkhelah hian Argentine forward Angel Correa chuan goal hnih a khung a. Hnehna an channa kawngah pawimawh hle in La Liga-ah a zawna vawi thum an chakna a ni.
Mualneitu lam hian an mikhualte hi inkhel tan tir atangin an thunun hneh a, an lakah ball chang hnem zawkin inkhelah an langsar zawk.
Mahse a pawimawh ber goal erawh Cadiz in an khung hmasa zawk a. Minute 12-naah Chris Ramos chuan ding lam atang ball vawrh lutin left back Lucas Pires chuan goal-ah a khung. Minute 27-naah Cadiz bawk an che leh a, Roger Marti-a finishing fing tak mai chu Atletico goal-ah a lut.
Correa in Atletico tan minute 32-naah goal khat a khung a. Halftime zawh a inkhel an tan leh hnu lawkah Nahuel Molina chuan an goal hnihna a khung a. A ball pet kawh tak chuan defender perin an si phurh a sut.
Minute 65-naah Correa bawk inlar lehin Diego Simeone pawlte chakna goal a khung.
Simeone chuan, “He comeback hian min ti lawm hle, a chhan chu goal hnih chhuah hnuah thil awlsam a ni lo. Mahse kan team kan chiai mai lova, kha khan kan han chakna kawng a hawng a ni.” a ti.
“Tunah chuan kan chawl hahdam anga, Champions League inkhel kan hmachhawn hma in inbuatsaihna hun tlem kan nei a, inkhel hautak tak hmachhawn turin kan inbuatsaih ang.” a ti bawk.