Line of Control chhehvela India leh Pakistan sipaite inkahna kal zelah nimin khan India sipaite chuan Pakistani sipai tanhmun (post) 7 an kap chhe vek.
Pakistani sipaite hian India lam hawiin ramri hnaih, Rajouri leh Poonch district-ah tun hnaiah nasa taka inkahhai bawhchhiain silai an hmehpuak a. Inkahna a awm reng avang hian heng district pahniha sikul zawng zawng pawh nimin khan khar vek a ni.
Thawhtanni pawh khan Poonch district-a Pakistan sipaiten mortar hmanga India an beihnaah BSF inspector leh hmeichhe naupang kum 5 mi an thi a, mi dang 24 velin hliam an tuar bawk.
Hetianga Pakistani sipaite an chet reng avang hian Indian Army pawhin an theih ang angin an chhang let a, Poonch district leh Rajouri district-a Nowshera sector-ah chuan silai puak thawm hriat tur a awm reng a ni.
Nimin khan Pakistani sipaite hian Shahpur sub-sector, Poonch leh Nowshera-ah India an kap leh a. Indian sipaiten an beih letnaah Pakistan Occupied Kashmir (PoK) huam chhunga Rakhchikri leh Rawalakote-a an tanhmun 7 zet an tihchhiatsak a, Pakistan sipai eng emaw zat an thi niin an sawi bawk.
Pakistan Inter-Services Public Relations (ISPR) chuan Pakistan Army 3 an thi tih an sawi.
Pakistan hian India kah nan hian ralthuam liantham chi leh 120 mm mortar bomb an hmang a, civil mite chenna pawh sawi lovin an kah zel avangin ramria chengte an chiai hle niin sipaite chuan an sawi.
Hetianga Pakistan-in mortar an hman reng avang hian thuneitute chuan mipuite chu pawn chhuak tam lo turin an ti a ni.