Aizawl: Rs. 21,40,000 senga sak MUP Dinthar Branch building thar chu nimin khan I&PR Minister Lalruatkima’n a hawng.
Hawnna inkhawmah Minister Lalruatkima chuan ram statistic enin Mizo mipate an tan a ngai tih a sawi a. Nakin lawkah hnam hi a ral mai ang tih a hlauhawm avangin fa neih tam inzirtir that leh a ngai tih sawiin, “Chu chu kan hnam damna tur a ni,” a ti.
I&PR Minister chuan sumdawng lian company-te pawhin mihring tamna apiangah investment an tih thin avangin, MUP member te chu an tu leh fate, fa neih tam pawimawhzia kawhhmuh tur ni theuh turin a chah a. Upate chawi a, zahna lan tir thin hnam an nih angin Mizo hnam a dam theih nan an tu leh fate ah Mizo tlawmngaihna, rinawmna, taimakna, huaisenna leh thian chhan thih ngam an nihna vawnnun zel a nih theihnan uar taka zirtir fo turin a chah bawk.
Dinthar MUP building sak nan hian bialtu MLA Minister Lalruatkima’n MLA Fund Rs 13,50,000 a pek bakah mi thahnemngaite thawhkhawm nen, a vaiin Rs 21,40,000 senga saka ni a. Building zau zawng hi feet 31 bial a ni.