Kum nga liam ta chhungin Chhattisgarh-a Left Wing Extremism (LWE) chetna chu 52% zetin a thlahniam a, khaw 589 zet chu hengho laka fihlim khua an ni tawh tih state sorkarin Thawhtanni khan a sawi.
Chhattisgarh sorkarin an state-a Maoist helho dinhmun a tihchhuah hi Prime Minister Narendra Modi-a’n Bastar district khawpui, Jagdalpur a tlawh hma ni chiahah a ni a. He district hi Bastar division-a Naxal helho chet nasatna thin pasarih zinga pakhat a ni.
Sorkar thuchhuahah hian Chief Minister Bhupesh Baghel-a kaihhruai sorkar hi LWE-te tihtawp nan hian ‘Gadhbo Nava Chhattisgarh’ (Chhattisgarh thar siam) tih thupui nena tangin an thawk a, kal dan chi thum – inrintawnna, himna leh hmasawnna tih chu an kalpui a ni tih an tar lang.
State sorkarin policy a neih hmang hian mipuiin sorkar a ringngam a, sorkarin buaina awm lohna (zero-tolerance) policy a kalpui chuan pawikhawihna nasa takin a tihniam tih an tar lang.
Kum 2018 leh 2022 inkar chhungin Naxal tharum thawhna hi 52% zetin a tlahniam tih an sawi.
Chief minister hmalakna avangin kum 15 zet Naxal helho chetna thin avanga sikul khar tawh 314-te pawh hawn a ni a. Heng bakah hian mihring nuai 5.74 zet chenna khaw 589 chu tunah chuan Naxal tharum thawhnain a tihbuai ngai tawh lo a ni tih an tar lang bawk.
Kum 2019 atanga chhiar tanin hmeichhiate laka pawikhawihna pawh kum 2015 leh 2015 inkar aiin 40% zetin a tlahniam bawk tih an tar lang.
Hmeichhiate laka pawikhawihna tihtlem a nih theih nan hian district pali-ah women police station hran din a ni a. Station leh post 455-ah special women cell pawh mumal takin kalpui a ni tih an tar lang bawk.
State sorkar hian online pawh huamin, pawisa khelh khapna, Chhattisgarh Gambling (Prohibition) Act-2022 a siam bawk.
Chhattisgarh hi chit-fund company-ten mi buma pawisa an laksak thin pek let lehna thin state awm chhun niin an tar lang bawk.